శ్వేతసౌధంలో కరోనా కలవరం.. 'పెన్స్'​​ సెక్రటరీకి పాజిటివ్​

అమెరికా అధ్యక్షుడి అధికారిక కార్యాలయం శ్వేతసౌధంలో మరొకరికి కరోనా సోకింది. దేశ ఉపాధ్యక్షుడు మైక్​ పెన్స్​ సహాయక బృందంలోని ప్రెస్​ కార్యదర్శి కేటీ మిల్లర్​కు వైరస్​ పాజిటివ్​గా తేలినట్లు అధ్యక్షుడు ట్రంప్​ ప్రకటించారు. అప్రమత్తమైన అధికారులు.. పెన్స్​కు కొవిడ్​ పరీక్షలు నిర్వహించగా నెగటివ్​గా తేలింది.

అమెరికాలో కరోనా పరిస్థితిని ఎప్పటికప్పుడు సమీక్షిస్తున్న ఉపాధ్యక్షుడు మైక్​ పెన్స్​.. సహాయక బృందంలోని కీలక వ్యక్తికి వైరస్​ సోకింది. ఆయన ప్రెస్​ సెక్రటరీ, కార్యాలయ అధికార ప్రతినిధి కేటీ మిల్లర్​కు కరోనా పాజిటివ్​గా నిర్ధరణ అయింది. శ్వేతసౌధంలో వారం వ్యవధిలో ఇది రెండో కేసుగా.. పెన్స్​ కార్యాలయం ఓ ప్రకటనలో తెలిపింది.

కేటీకి గురువారం నిర్వహించిన పరీక్షల్లో నెగటివ్​గా తేలగా.. శుక్రవారం పాజిటివ్​గా నిర్ధరణ అయింది.

పెన్స్​ సిబ్బందిలో ఒకరికి కరోనా సోకినట్లుగా శ్వేతసౌధం ముందుగానే ప్రకటించినప్పటికీ.. ఆ వ్యక్తి పేరు వెల్లడించలేదు. అనంతరం మీడియాతో మాట్లాడిన అధ్యక్షుడు డొనాల్డ్​ ట్రంప్​.. బాధితురాలు కేటీగా ధ్రువీకరించారు. ఆమె ఇటీవలి కాలంలో తనను కలిసింది లేదని, కానీ.. ఉద్యోగరీత్యా ఉపాధ్యక్షుడితో కలుస్తుంటారని ట్రంప్​ చెప్పారు.

'' కేటీ మంచి యువతి. ఆమెకు అంతకుముందు పరీక్షలు నిర్వహించగా.. ఫలితం సానుకూలంగానే వచ్చింది. కానీ ఉన్నట్టుండి పాజిటివ్​గా తేలింది.''

- డొనాల్డ్​ ట్రంప్​, అమెరికా అధ్యక్షుడు

పెన్స్​కు కూడా కరోనా పరీక్షలు చేయగా.. నెగటివ్​గా తేలినట్లు వెల్లడించారు ట్రంప్​. వైట్​హౌస్​లో కరోనా నివారణ చర్యలు చేపట్టినట్లు స్పష్టం చేశారు.

సమీక్షలకు హాజరు...

మిల్లర్​ ఇటీవలి కాలంలో కరోనా వైరస్ టాస్క్​ ఫోర్స్​​ సమీక్షల్లో పాల్గొనడం.. శ్వేతసౌధంలో కలవరానికి కారణమైంది. ఆమె... ట్రంప్​ సలహాదారుల్లో ముఖ్యులు, సీనియర్​ పాలసీ అడ్వైజర్​ స్టీఫెన్​ మిల్లర్​ను వివాహమాడింది.

వైట్​హౌస్​లో పనిచేసే యూఎస్ మిలటరీకి చెందిన ఓ అధికారికి గురువారం కరోనా సోకింది. ఇదే శ్వేతసౌధంలో తొలి కేసు. అప్రమత్తమైన అధికారులు ట్రంప్, పెన్స్​లకు కరోనా పరీక్ష చేయగా వారికి నెగిటివ్ అని వచ్చింది.

అమెరికాలో కరోనా విజృంభిస్తోంది. దేశంలో ఇప్పటివరకు 13 లక్షల 22 వేలమందికిపైగా కొవిడ్​ సోకగా.. మృతుల సంఖ్య 78 వేలు దాటింది.