విద్యుత్​ కార్ల ఛార్జింగ్​ కోసం 5 లక్షల స్టేషన్లు!

విద్యుత్​ వాహనాలను పెద్దఎత్తున రహదారులపైకి తీసుకొచ్చేందుకు ప్రయత్నిస్తోంది అమెరికా. ఇందులో భాగంగా ఐదు లక్షలకు పైగా ఈవీ ఛార్జింగ్​ స్టేషన్లను నిర్మించాలని బైడెన్​ సర్కార్​ యోచిస్తున్నట్లు శ్వేతసౌధం వెల్లడించింది.

ఐదు లక్షల విద్యుత్​ వాహన(ఈవీ) ఛార్జింగ్​ స్టేషన్లను ఏర్పాటు చేయాలని బైడెన్​ సర్కార్​ యోచిస్తున్నట్లు శ్వేతసౌధం వెల్లడించింది. ఈవీలను భారీఎత్తున రోడ్డు ఎక్కించి.. వాతావరణ కాలుష్య సంక్షోభం నుంచి బయటపడేందుకు, ఆర్థిక పునరుద్ధరణ సాధించేందుకు ప్రణాళికలు రూపొందిస్తున్నట్లు పేర్కొంది.

"ఈవీ ఛార్జింగ్​ మౌలిక సదుపాయాల సంస్థల సీఈఓలతో జాతీయ వాతావరణ సలహాదారు గినా మెక్​కార్తీ సహా పలు సంస్థలకు చెందిన సీనియర్​ అధికారులు ఇప్పటికే వర్చువల్​ సమావేశం నిర్వహించారు. దేశీయ సరఫరా వ్యవస్థను బలోపేతం చేసి.. అమెరికన్​ తయారీని పెంచే పెట్టుబడులపై అధ్యక్షుడు జో బైడెన్​ నిబద్ధతను మెక్​కార్తీ ఈ భేటీలో వివరించారు. వాహనాల విద్యుదీకరణతో ఉద్యోగాల సృష్టి జరుగుతోందని పేర్కొన్నారు. ఇందుకోసం 5 లక్షల ఈవీ ఛార్జింగ్​ స్టేషన్లు ఏర్పాటు చేయడం ప్రభుత్వ లక్ష్యమని చెప్పారు. ఈవీల ప్రాముఖ్యంపై చర్చించిన ఆయా సంస్థల అధినేతలు.. ప్రభుత్వంతో కలిసి పని చేయడానికి సముఖంగా ఉన్నట్లు తెలిపారు" అని శ్వేతసౌధం వెల్లడించింది.

ఇదీ చూడండి:'మే చివరినాటికి వయోజనులందరికీ కరోనా టీకా'