నింగిలోకి దూసుకెళ్లిన 'కల్పనా చావ్లా' వ్యోమనౌక

భారతీయ అమెరికన్​ వ్యోమగామి కల్పనా చావ్లా పేరు పెట్టిన వ్యోమనౌక.. ఇవాళ అంతర్జాతీయ అంతరిక్ష కేంద్రానికి బయలుదేరింది. వర్జీనియా తీరంలోని నాసా వాలోప్స్ ఫెసిలిటీ కేంద్రం నుంటి ఈ స్పేస్​క్రాఫ్ట్​ను ప్రయోగించారు. సుమారు 3,600 కిలోల సరుకులతో ఈ కార్గో అంతరిక్ష నౌక సోమవారం నాటికి ఐఎస్​ఎస్​కు చేరుకుంటుంది.

భారత సంతతి అమెరికన్ అయిన వ్యోమగామి కల్పనా చావ్లాకు అరుదైన గౌరవం దక్కింది. ఆమె పేరు పెట్టిన అంతరిక్ష నౌక.. తాజాగా అంతర్జాతీయ అంతరిక్ష కేంద్రానికి పయనమైంది. అమెరికా ఏరోస్పేస్ సంస్థ నార్తోర్ప్‌ గ్రుమన్‌ తయారు చేసిన ఈ అంతరిక్ష నౌకను.. వర్జీనియా తీరంలో ఉన్న నాసా వాలోప్స్‌ ఫ్లైట్ ఫెసిలిటీ కేంద్రం నుంచి ప్రయోగించారు.

కల్పనా చావ్లా కార్గొ స్పేస్​క్రాఫ్ట్

ఎస్​ఎస్​ కల్పనా చావ్లా అంతరిక్ష నౌక.. 360 డిగ్రీల కోణంలో స్పేస్‌ వాక్‌ను చిత్రించే కెమెరాను తీసుకెళ్తోంది. అంతరిక్షంలో పండించడానికి అవసరమైన ముల్లంగి విత్తనాలు, మాంసం వంటి ఆహార పదార్థాలను మోసుకొని అంతర్జాతీయ అంతరిక్ష కేంద్రానికి బయలుదేరింది.

ఈ వ్యోమనౌక 3,600 కిలోల సరకులతో అక్టోబర్​5 నాటికి ఐఎస్​ఎస్​ను చేరుతుందని అధికారులు వెల్లడించారు. 23 మిలియన్ డాలర్ల ఖర్చు చేసి టైటానియంతో నిర్మించిన మహిళల శౌచాలయాన్ని కూడా అంతరిక్ష నౌక మోసుకొని వెళ్లింది.

ఇదీ చూడండి:అంతరిక్షంలోకి కల్పనా చావ్లా పేరుతో వ్యోమనౌక