కరోనా వైరస్పై పోరుకు.. అమెరికా అధ్యక్షుడు డొనాల్డ్ ట్రంప్ ప్రతిపాదించిన 2 ట్రిలియన్ డాలర్ల ఆర్థిక ప్యాకేజీ ఎట్టకేలకు గట్టెక్కనుంది. ఐదు రోజుల సుదీర్ఘ చర్చల అనంతరం ఇందుకోసం సెనేట్- శ్వేతసౌధం మధ్య ఓ ఒప్పందం కుదిరింది.
"మేము ఓ ఒప్పందానికి వచ్చాం. ఈ ఆర్థిక ప్యాకేజీ దేశ చరిత్రలోనే ఎంతో పెద్దది. చాలా మంది ప్రజలు ఎలాంటి తప్పుచేయనప్పటికీ.. వారి ఉద్యోగాలకు దూరంగా ఉంటున్నారు. భవిష్యత్తు ఎలా ఉంటుందో వారికి తెలియదు. బిల్లులు ఎలా కడతారో ఆర్థం కావడం లేదు. వారిని ఆదుకోవడానికి మేము వచ్చేస్తున్నాం."
--- మిచ్ మెక్కాన్నెల్, సెనేట్ సభ్యుడు.
కరోనా వైరస్ విజృంభిస్తున్న తరుణంలో.. అమెరికా ఆర్థిక వ్యవస్థపై భారం పడకుండా, విపత్తు నుంచి అగ్రరాజ్య ప్రజలను గట్టెక్కించడానికి ట్రంప్ 2 ట్రిలియన్ డాలర్ల ఆర్థిక ప్యాకేజీని ప్రతిపాదించారు.
ఇప్పటికే దిగువ సభలో బిల్లును ఒకసారి ప్రవేశపెట్టగా.. డెమొక్రాట్ల మద్దతు లభించకపోవడం వల్ల అది వీగిపోయింది. తాజా ఒప్పందం అనంతరం అమెరికా కాలమానం ప్రకారం బుధవారం ఈ బిల్లు మరోమారు సెనెట్ వద్దకు రానుంది. సెనేట్లోని 60 మంది మద్దతు అవసరం. ఇక్కడ బిల్లు ఆమోదం పొందిన అనంతరం ఎగువ సభలో ప్రవేశపెడతారు. తర్వాత ఈ చట్టాన్ని అమలు చేసేందుకు అధ్యక్షుడు డొనాల్డ్ ట్రంప్ సంతకం అవసరం.
