US sanctions on China: చైనాకు అమెరికా మరో షాక్ ఇచ్చింది. ఆ దేశానికి చెందిన బయోటెక్, నిఘా సంస్థలపై కొత్త ఆంక్షలు విధిస్తున్నట్లు గురువారం ప్రకటించింది. జిన్జియాంగ్ రాష్ట్రంలో ఉయ్ఘర్ ముస్లింలపై మానవహక్కుల ఉల్లంఘన జరుగుతోందని అందుకే తాము ఈ చర్యలు చేపట్టినట్లు తెలిపింది.
చైనా మిలిటరీకి సాయం అందించే చైనా అకాడమీ ఆఫ్ మిలిటరీ సైన్సెస్, దాని 11 పరిశోధన సంస్థలు లక్ష్యంగా అమెరికా వాణిజ్య విభాగం ఈ ఆంక్షలు విధించినట్లు తెలుస్తోంది. ఉయ్ఘర్లను అణచివేసేందుకు జిన్జియాంగ్ రాష్ట్రంలో చైనా ప్రత్యేక నిఘా పెట్టిందని, బయోమెట్రిక్ ఫేస్ రికగ్నిషన్ ఉపయోగించి 12 నుంచి 65 ఏళ్ల మధ్య వయస్కుల డీఎన్ఏ సేకరిస్తున్నట్లు తమ నిఘా వర్గాల దృష్టికి వచ్చిందని అమెరికా అధికారిక వర్గాలు తెలిపాయి. అందుకే ఈ ఆంక్షలు విధిస్తున్నట్లు వివరించాయి.
జిన్జియాంగ్ నుంచి దిగుమతులపైనా నిషేధం
జిన్జియాంగ్ ప్రాంతంలో ప్రజలతో చైనా బలవంతపు చాకిరీ చేయించుకుంటోందంటూ ఆరోపణలు వెల్లువెత్తుతున్న నేపథ్యంలో అమెరికా కొరడా ఝుళిపించింది. జిన్జియాంగ్ రాష్ట్రం నుంచి తమ దేశానికి అన్ని దిగుమతులను నిషేధిస్తూ తీసుకొచ్చిన బిల్లుకు సెనేట్ గురువారం ఏకగ్రీవంగా ఆమోద ముద్ర వేసింది. బలవంతపు చాకిరీ లేకుండానే తయారుచేశామని నిరూపించగలిగిన ఉత్పత్తులను మాత్రమే అక్కడి నుంచి దిగుమతి చేసుకునేలా మినహాయింపు ఇచ్చింది. ఈ బిల్లుపై అమెరికా అధ్యక్షుడు జో బైడెన్ సంతకం చేయడం ఇక లాంఛనప్రాయమే.
US China news
జిన్జియాంగ్లో జరుగుతున్న మానవ హక్కుల ఉల్లంఘనలకు నిరసనగా బీజింగ్లో జరిగే వింటర్ ఒలింపిక్స్ను దౌత్యపరంగా బహిష్కరిస్తున్నట్లు అమెరికా గతవారమే ప్రకటించింది. అయితే తమ ఆటగాళ్లు మాత్రం యథావిధిగా పాల్గొంటారని చెప్పింది.
ఇదీ చదవండి:అమ్మడం కోసమే పిల్లల్ని కన్న తండ్రి- రూ.31లక్షలకు ఐదుగురు!
