మెరిట్ ఆధారిత వలస విధానానికి ట్రంప్ ఆదేశాలు

అమెరికా వలస విధానంలో కీలక మార్పులకు తెరతీశారు అధ్యక్షుడు డొనాల్డ్ ట్రంప్. మెరిట్ ఆధారిత ఇమిగ్రేషన్ వ్యవస్థను అమల్లోకి తెచ్చే ఉద్దేశంతో ఎగ్జిక్యూటివ్ ఆర్డర్​ను జారీ చేశారు. అనంతరం దీనిని బిల్లుగా రూపొందించి అమెరికా కాంగ్రెస్​లో ప్రవేశపెడతారు. సభ్యుల ఆమోదం పొందితే చట్టంగా మారుతుంది.

అమెరికా అధ్యక్షుడు డొనాల్డ్ ట్రంప్ ఇమిగ్రేషన్​ వ్యవస్థకు సంబంధించి కీలక నిర్ణయం తీసుకున్నారు. మెరిట్ ఆధారిత ఇమిగ్రేషన్ వ్యవస్థను అమల్లోకి తీసుకొస్తూ ఎగ్జిక్యూటివ్ ఆర్డర్​ జారీ చేశారు. ఈ మేరకు శ్వేతసౌధం ప్రకటన విడుదల చేసింది.

వలస విధానాల్లో మార్పులకు సంబంధించి ఓ టీవీ ముఖాముఖిలో కీలక వ్యాఖ్యలు చేశారు ట్రంప్. అనంతరమే ఈ ఆదేశాలు వెలువడ్డాయి. చిన్నవయస్సులోనే అమెరికాకు వెళ్లేవారికి సంబంధించి కూడా ఈ ఆదేశాల్లో ఉటంకించారు ట్రంప్. చిన్నవయస్సు వలసదారుల కోసం ఉద్దేశించిన డిఫర్ర్​డ్ యాక్షన్ ఫర్ చైల్డ్ హుడ్ అరైవల్స్(డీఏసీఏ) వలస చట్టంలో కీలక మార్పని చెప్పారు ట్రంప్. ఇది భవిష్యత్తులో పౌరసత్వాన్ని పొందేందుకు మార్గంగా పనిచేస్తుందని వెల్లడించింది.

"ఇది చాలా పెద్ద బిల్లు అవుతుంది. ఈ మెరిట్ ఆధారిత బిల్లులోనే చిన్న వయస్సులో వలసవచ్చే వారికి కల్పించే సదుపాయాల నిబంధనలకు (డిఫర్ర్​డ్ యాక్షన్ ఫర్ చైల్డ్​హుడ్ అరైవల్స్- డీఏసీఏ) సవరణలు ఉంటాయి. దీనిపై ప్రజలంతా సంతోషంగా ఉంటారు. డీఏసీఏ ద్వారా చిన్నవయస్సులో వలసవచ్చినవారు పౌరసత్వాన్ని పొందేందుకు మార్గం సుగమమవుతుంది."

-డొనాల్డ్ ట్రంప్, అమెరికా అధ్యక్షుడు

అమెరికా పౌరులకు భవిష్యత్తులో ఉపాధి కల్పనలో ఇబ్బందులు తలెత్తకుండా ఉండేందుకే మెరిట్ ఆధారిత వలస విధానాన్ని తెచ్చేందుకు ట్రంప్ ప్రయత్నిస్తున్నారని ప్రకటించింది శ్వేతసౌధం. ఈ ప్రతిపాదిత చట్టంలోనే సరిహద్దు భద్రత, శాశ్వత మెరిట్ ఆధారిత వ్యవస్థను తెచ్చేందుకు ట్రంప్ ప్రయత్నిస్తున్నారని వెల్లడించింది.

బిల్లును తయారుచేసేందుకు ఎగ్జిక్యూటివ్ ఆర్డర్​ను జారీ చేస్తారు. సంబంధిత అధికారులు బిల్లును రూపొందించిన అనంతరం దానిని చట్టసభల్లో ప్రవేశపెడతారు. సభ్యుల నిర్ణయంపై బిల్లు భవితవ్యం ఆధారపడి ఉంటుంది.

ఇదీ చూడండి:'చైనాతో వాణిజ్య ఒప్పందం ఇప్పట్లో లేనట్టే'