అగ్రరాజ్యంలో నిరసనలు.. ఒకరు మృతి

అమెరికాలోని పోర్ట్​ల్యాండ్​లో నిరసనలు హింసాత్మకంగా మారాయి. ఈ నేపథ్యంలో జరిగిన కాల్పుల్లో ఓ వ్యక్తి మృతి చెందాడు. ఈ ఘటనపై దర్యాప్తు చేపట్టారు అధికారులు.

అమెరికాలోని ఒరెగాన్​ రాష్ట్రం నిరసనలతో హోరెత్తింది. పోర్ట్​ల్యాండ్​లో జరుగుతున్న ఆందోళనల్లో భాగంగా కాల్పుల కలకలం రేగింది. ఈ ఘటనలో ఓ వ్యక్తి మరణించడం వల్ల.. నిరసనలు మరింత హింసాత్మకంగా మారాయి. అయితేే మృతుడు ఎవరనేది ఇంకా స్పష్టత రాలేదు. ఈ ఘటనపై అధికారులు దర్యాప్తు చేపట్టారు.

మృతదేహం వద్ద అధికారులు

ఫెడరల్​ అధికారులు.. ఎలాంటి బ్యాడ్జ్​లు, నేమ్​ ట్యాగ్​లు లేకుండానే ఆందోళనకారుల్ని చట్ట విరుద్ధంగా అదుపులోకి తీసుకుంటున్నారనే కారణంతో పోర్ట్​ల్యాండ్​లో ఘర్షణ నెలకొంది.

హింసాత్మకంగా మారిన పోర్ట్​ల్యాండ్​ నిరసనలు

ఈ ఘటనను డెమొక్రటిక్​ పార్టీ అభ్యర్థి జో బైడెన్​ తీవ్రంగా ఖండించారు. అగ్రరాజ్య అధ్యక్షుడు డొనాల్డ్​ ట్రంప్​ కూడా ఇదే విధంగా చేయాలని ట్విట్టర్​ వేదికగా సవాల్​ విసిరారు.

'పోర్ట్​ల్యాండ్​ హింసాత్మక ఘటన ఏ మాత్రం ఆమోదయోగ్యం కాదు. అమెరికా లాంటి గొప్ప దేశంలోని నగర వీధుల్లో ఇలా కాల్పులు జరగడం దురదృష్టకరం. దీనిని నేను తీవ్రంగా ఖండిస్తున్నా. ట్రంప్​ కూడా అలాగే చేయాలని సవాల్ చేస్తున్నా.'

- జో బైడెన్​, డెమొక్రటిక్​ పార్టీ

దీనిపై స్పందించిన ట్రంప్​.. ఈ ఘటనకు పోర్ట్​ల్యాండ్​ డెమొక్రట్​ మేయర్​ టెడ్​ వీలర్​ కారణమని ఆరోపించారు.

'దేశంలో అందరిలాగే పోర్ట్​ల్యాండ్​ ప్రజలూ శాంతిభద్రతలను కోరుతున్నారు. కానీ ప్రస్తుతం అక్కడున్న రాడికల్​ డెమొక్రట్​ మేయర్​ మాత్రం ఈ ఘటనపై ఇప్పటివరకూ స్పందించ లేదు. భవిష్యత్తులోనూ ఇలాగే ఉంటారు.'

- డొనాల్డ్​ ట్రంప్​, అమెరికా అధ్యక్షుడు.

టెడ్​ వీలర్​ పదవి కాలంలో అనేకసార్లు తీవ్ర ఉద్రిక్తతలు నెలకొన్నాయన్న ట్రంప్.. ఇలాంటి విధ్వంసాలే ఆయన కోరుకుంటారని ఆరోపించారు. వీలర్​ లాంటి వ్యక్తులు మేయర్​గా ఉన్నంతకాలం పోర్ట్​ల్యాండ్​ పరిస్థితులు ఇలాగే ఉంటాయని చెప్పుకొచ్చారు ట్రంప్​.

ఇదీ చదవండి:ఫిలిప్పీన్స్​లో రైతులపై కాల్పులు- 9 మంది మృతి