రణరంగంలా అగ్రరాజ్యం- రంగంలోకి సైన్యం!

అమెరికాలో పోలీసు అతి ప్రవర్తన కారణంగా ప్రాణాలు కోల్పోయిన నల్లజాతీయుడు జార్జి ఫ్లాయిడ్​ మృతికి న్యాయం కోసం జరుగుతున్న నిరసనలు హింసాత్మకంగా మారాయి. డెట్రాయిట్ నగరంలో ఆందోళనకారులను చెదరగొట్టేందుకు జరిపిన కాల్పుల్లో ఓ వ్యక్తి మృతి చెందాడు. అట్లాంటా, వాషింగ్టన్, లాస్ ఏంజిల్స్ నగరాల్లో రహదారులను దిగ్బంధిస్తున్నారు నిరసనకారులు. ఈ నేపథ్యంలో సైన్యం సాయంతో ఆందోళనలను అణిచేందుకు నిర్ణయం తీసుకుంది ప్రభుత్వం. ఘటన జరిగిన మిన్నెపొలిస్​లో సైన్యాన్ని మోహరించనుంది.

నల్లజాతీయుడు జార్జి ఫ్లాయిడ్​ను మోకాలితో తొక్కి చంపడంపై అమెరికావ్యాప్తంగా నిరసనలు మిన్నంటుతున్నాయి. ఆఫ్రికన్ అమెరికన్లు అనేక రాష్ట్రాల్లో తీవ్ర స్థాయిలో ఆందోళనలు చేపడుతున్నారు. అట్లాంటా, వాషింగ్టన్, మిన్నెపొలిస్​ సహా వివిధ రాష్ట్రాలు అట్టుడుకుతున్నాయి.

డెట్రాయిట్​ నగరంలో ఆందోళనలను అణిచేందుకు జరిపిన కాల్పుల్లో ఓ వ్యక్తి ప్రాణాలు కోల్పోయాడు. ఫీనిక్స్, డెన్వర్, లాస్​ వెగాస్, లాస్ ఏంజిల్స్​ నగరాల్లో వేలసంఖ్యలో ఆందోళనకారులు గుమిగూడారు. 'న్యాయం జరిగే వరకు శాంతించేది లేదు' అంటూ నినాదాలు చేస్తున్నారు.

శ్వేతసౌధం వద్ద..

అట్లాంటాలో హింసాత్మకంగా..

అట్లాంటాలో చాలా సమయం పాటు శాంతియుతంగా జరిగిన నిరసన ఒక్కసారిగా హింసాత్మకంగా మారింది. నిరసనకారులు పోలీసుల కార్లను ధ్వంసం చేసి నిప్పుపెట్టారు. సీఎన్​ఎన్ ప్రధాన కార్యాలయం వద్దనున్న లోగో సహా ఓ రెస్టారెంట్​ను ధ్వంసం చేశారు. పోలీసులే లక్ష్యంగా బాటిళ్లు, చాకులు, బొమ్మ తుపాకులను విసిరారు. 'ఇంకా ఎంతమంది ఇలా బలవ్వాలి' అని నినదించారు. నిరసనలు చేస్తున్న పలువురిని అరెస్టు చేశారు పోలీసులు.

అలసినా.. నిరసనకే సిద్ధం

రిపోర్టర్లు అరెస్ట్.. గవర్నర్ క్షమాపణలు

మిన్నెసోటాలో నిరసనలను ప్రత్యక్ష ప్రసారం చేస్తున్న సీఎన్ఎన్ పాత్రికేయులు,​ సిబ్బందిని పోలీసులు అరెస్ట్ చేశారు. లైవ్​లో ప్రసారమైన ఈ వీడియో వైరల్​గా మారి పోలీసుల తీరుపై విమర్శలు వచ్చాయి. ఈ ఘటనపై విచారం వ్యక్తం చేసిన మిన్నెసొటా గవర్నర్ టిమ్ వాల్జ్ మీడియాకు క్షమాపణలు తెలిపారు. ఆందోళనకారుల్లో రిపోర్టర్లు కూడా భాగమని భావించి అరెస్ట్ చేసినట్లు ఘటనపై వివరణ ఇచ్చారు అధికారులు.

మిన్నెపొలిస్​కు సైన్యం తరలింపు..

పదికి పైగా నగరాల్లో నల్లజాతీయుడి మృతిపై అశాంతిగా మారిన నేపథ్యంలో ఆందోళనలను అణిచే దిశగా చర్యలు చేపట్టింది ప్రభుత్వం. ఘటన జరిగిన మిన్నెపొలిస్​కు సైన్యాన్ని తరలించాలని నిర్ణయించింది. ఉత్తర కరోలినాలోని ఫోర్ట్​ బ్రాగ్, న్యూయార్క్​లోని ఫోర్ట్ డ్రమ్ సైనిక కేంద్రాల నుంచి సైన్యాన్ని తరలించనుంది.

నిరసనకారులను అదుపు చేస్తూ రక్షణ సిబ్బంది

ఇదీ జరిగింది..

ఫోర్జరీ కేసు దర్యాప్తు చేస్తున్న పోలీసులు.. మిన్నెపొలిస్‌లో సోమవారం రాత్రి ఆఫ్రికన్‌ అమెరికన్‌ జార్జి ఫ్లాయిడ్​ను అనుమానితుడిగా గుర్తించి విచారించేందుకు వెళ్లారు. సంకెళ్లు వేసి జార్జ్‌ మెడపై ఓ పోలీసు అధికారి మోకాలు బలంగా ఉంచాడు. ఊపిరి తీసుకోలేక జార్జి ప్రాణాలు కోల్పోయాడు. మృతికి కారణమైన పోలీసుపై హత్య కేసు నమోదు చేసి అరెస్ట్​ చేశారు. ఘటనా సమయంలో అక్కడే ఉన్న నలుగురు అధికారులను బాధ్యులను చేస్తూ ఇప్పటికే విధుల నుంచి తొలగించారు.

ఇవీ చూడండి:పోలీసు అమానుష ప్రవర్తన.. హత్య కేసు నమోదు