ఇరాన్ నిఘా కేంద్రాల​పై అమెరికా సైబర్​ దాడి

అమెరికా నిఘా డ్రోన్​ను కూల్చివేయడానికి ప్రతీకారంగా ఇరాన్​ క్షిపణి నియంత్రణ వ్యవస్థలు, నిఘా కేంద్రాలపై అగ్రరాజ్యం​ సైబర్​ దాడులు చేపట్టింది. ఈ విషయాన్ని అమెరికాకు చెందిన మీడియా సంస్థ వాషింగ్టన్​ పోస్ట్ వెల్లడించింది.

ఇరాన్ క్షిపణి నియంత్రణ వ్యవస్థలు, నిఘా కేంద్రాలపై అమెరికా సైబర్​ దాడులు చేపట్టింది. అగ్రరాజ్య నిఘా డ్రోన్​ను ఇరాన్​ కూల్చేసినందుకు ప్రతీకారంగా ఈ చర్యలు చేపట్టినట్లు ఆ దేశ మీడియా వెల్లడించింది.

అమెరికా నిఘా డ్రోన్​ను ఇరాన్​ కూల్చిన వెంటనే ప్రతీకార దాడులకు అధ్యక్షుడు ట్రంప్​ సిద్ధపడ్డారు. కానీ ఆ నిర్ణయాన్ని మార్చుకున్నారు. బదులుగా ఇరాన్​పై మరిన్ని ఆంక్షలు విధించాలని నిర్ణయించారు.

అదే సమయంలో ఇరాన్​పై సైబర్​ దాడులు నిర్వహించాలని రహస్యంగా యూఎస్​ సైబర్​ కమాండ్​ను ట్రంప్​ ఆదేశించారని వాషింగ్టన్​ పోస్టు ఓ కథనం ప్రచురించింది. ఈ సైబర్​ దాడితో ఇరాన్​ రాకెట్​, క్షిపణి ప్రయోగాలను నియంత్రించడానికి ఉపయోగించే కంప్యూటర్లు నిర్వీర్యమయ్యాయని తెలిపింది.

ఢీ అంటే ఢీ...

అమెరికాపై ఇరాన్​ సైతం సైబర్​ దాడులకు పాల్పడుతోంది. ఈ దాడులపై అమెరికా జాతీయ భద్రత సంస్థ స్పందించింది. ఇరు దేశాల మధ్య నెలకొన్న పరిస్థితుల నేపథ్యంలో అగ్రరాజ్యం తగిన చర్యలు చేపట్టినట్లు పేర్కొంది.

సర్వత్రా ఆందోళన...

ప్రస్తుతం ఇరుదేశాల మధ్య నెలకొన్న ఉద్రిక్త పరిస్థితులు యుద్ధానికి దారితీసే అవకాశాలున్నాయని ప్రపంచ దేశాలు ఆందోళన చెందుతున్నాయి.

ఇదీ చూడండి: 'అణ్వాయుధాలు వీడితే ఆప్త మిత్రుడినవుతా'