ఉత్తర కొరియా అణు కార్యకలాపాలను కట్టడి చేసేందుకు త్రైపాక్షిక సహకారానికి కట్టుబడి ఉండాలని అమెరికా, జపాన్, దక్షిణ కొరియా నిర్ణయించాయి. ఈ మేరకు మూడు దేశాల జాతీయ భద్రతా సలహాదారులు.. ఓ సంయుక్త ప్రకటన విడుదల చేసినట్లు శ్వేతసౌధం తెలిపింది.
"ఉత్తర కొరియా అణు పరీక్షలు, బాలిస్టిక్ క్షిపణి ప్రయోగాల గురించి మూడు దేశాల జాతీయ భద్రతా సలహాదారులు తమ అభిప్రాయాల్ని పంచుకున్నారు. పరస్పర సహకారంతో వీటిని కట్టడి చేయాలని నిర్ణయించాయి."
-శ్వేతసౌధం ప్రకటన
అమెరికా జాతీయ భద్రతా సలహాదారు(ఎన్ఎస్ఏ) జాక్ సులివాన్, జపాన్ జాతీయ భద్రత చీఫ్ షిగేరు కితామురా, దక్షిణ కొరియా జాతీయ భద్రతా కార్యాలయం డైరెక్టర్ సూ హూన్.. శుక్రవారం వాషింగ్టన్లో భేటీ అయ్యారు. అయితే.. ఉత్తర కొరియాను ఎలా కట్టడి చేయనున్నారనే విషయాన్ని అమెరికా ఇంకా వెల్లడించలేదు. ఈ వారం దీనిపై తుది నిర్ణయం తీసుకునే అవకాశం ఉందని తెలుస్తోంది.
అమెరికా హెచ్చరికలను తోసిపుచ్చుతూ.. గత నెలలో క్షిపణి పరీక్షలు చేపట్టింది ఉత్తర కొరియా. రెండు కొత్తతరం గైడెడ్‌ మిసైల్స్ అనుకున్న లక్ష్యాన్ని ఛేదించినట్లు ఆ దేశ మీడియా వెల్లడించింది.
ఇదీ చూడండి:'క్షిపణి ప్రయోగాలపై ఐక్యరాజ్య సమితి ద్వంద్వ నీతి'