భారత్కు వెంటిలేటర్ల సాయం అందిస్తానని హామీ ఇచ్చిన అమెరికా.. అందుకు కార్యచరణ సిద్ధం చేసింది. మొత్తం 200 వెంటిలేటర్లు పంపనున్న అగ్రరాజ్యం.. తొలివిడతలో 50 వెంటిలేటర్లను అందించనుంది. త్వరలోనే ఈ వెంటిలేటర్లు భారత్కు చేరుకుంటాయని అమెరికా అంతర్జాతీయ అభివృద్ధి సంస్థ (యూఎస్ఏఐడీ) యాక్టింగ్ డైరెక్టర్ రమోనా ఎల్ హమ్జౌయి స్పష్టం చేశారు.
ఇదీ చూడండి: మిత్ర దేశం భారత్కు వెంటిలేటర్లు పంపిస్తా: ట్రంప్
"భారత్కు 200 వెంటిలేటర్లను అందించడానికి అమెరికా ప్రభుత్వం కసరత్తులు చేస్తోంది. త్వరలోనే తొలివిడతలో 50 వెంటిలేటర్లు భారత్కు చేరుకుంటాయి. వెంటిలేటర్లు పంపే అంశంపై భారత వైద్య శాఖ, ఇండియన్ రెడ్ క్రాస్ సొసైటీలతో సంప్రదింపులు జరుపుతున్నాం."
-రమోనా ఎల్ హమ్జౌయి, యూఎస్ఏఐడీ యాక్టింగ్ డైరెక్టర్
వ్యాపారం కాదు
భారత్ సరఫరా చేసిన హైడ్రాక్సీక్లోరోక్విన్కు బదులుగా వీటిని అందిస్తున్నారా? అని విలేకరులు ప్రశ్నించగా.. వెంటిలేటర్లను వ్యాపార దృష్టికోణంతో పంపడం లేదని రమోనా స్పష్టం చేశారు. వాటిని సాయం కిందే అందిస్తున్నట్లు తెలిపారు. అత్యవసరమైన వారికి వెంటనే చికిత్స అందించడానికి ఈ వెంటిలేటర్లు భారత్కు ఉపయోగపడతాయని వ్యాఖ్యానించారు.
కరోనా సాయం
వైరస్పై పోరాడటానికి ప్రపంచదేశాలకు అమెరికా అండగా ఉంటున్నట్లు తెలిపారు రమోనా. వివిధ దేశాల కోసం మొత్తం 900 మిలియన్ డాలర్ల నిధి అందుబాటులో ఉంచినట్లు తెలిపారు. ఇందులో భారత్కు 5.9 మిలియన్ డాలర్లు కేటాయించినట్లు స్పష్టం చేశారు.
సంయుక్త శిక్షణ
భారత్లోని 14 రాష్ట్రాలకు చెందిన 30 వేల హెల్త్ సెంటర్లలో విధులు నిర్వర్తిస్తున్న వైద్య సేవల సిబ్బందికి శిక్షణ ఇస్తున్నట్లు తెలిపారు రమోనా. భారత ప్రభుత్వ భాగస్వామ్యంతో ఇప్పటివరకు మొత్తం 20 వేల మంది సిబ్బందికి శిక్షణ ఇచ్చినట్లు స్పష్టం చేశారు.
