అమెరికాలో కరోనా మరణమృదంగం- 15వేలు దాటిన మృతులు

అమెరికాలో కరోనా విలయతాండవం చేస్తోంది. ప్రధానంగా న్యూయార్క్​లో గురువారం 799 మంది వైరస్​ కారణంగా బలయ్యారు. దేశవ్యాప్తంగా ఇప్పటివరకు 15 వేలమంది ప్రాణాలు కోల్పోయారు.

ప్రపంచదేశాలను వణికిస్తోన్న మహమ్మారి కరోనా అమెరికాపై పంజా విసురుతోంది. ప్రధానంగా న్యూయార్క్​లో గురువారం 799 మంది మృతి చెందారు. వరుసగా మూడోరోజు అత్యధిక మరణాలు సంభవించినట్లు రాష్ట్ర గవర్నర్​ తెలిపారు. అయితే ఐసీయూ, ఇంక్యుబేషన్​లో చేరుతున్న వారి సంఖ్య తగ్గినట్లు పేర్కొన్నారు.

న్యూయార్క్​లో ఇప్పటివరకు 7వేల మందికి పైగా మహమ్మారి బారిన పడి ప్రాణాలు కోల్పోయారు. అమెరికాలో గురువారం నాటికి మొత్తం మృతుల సంఖ్య 15,774కు చేరింది. కరోనా సోకిన వారి సంఖ్య 4 లక్షల 50 వేలు దాటింది.