ఖండాంతర బాలిస్టిక్ క్షిపణి ప్రయోగించిన అమెరికా

నిరాయుధ మినట్మన్ 3 ఖండాంతర బాలిస్టిక్ క్షిపణిని అమెరికా పరీక్షించింది. కాలిఫోర్నియా నుంచి ప్రయోగం చేపట్టినట్లు ఆ దేశ వాయుసేన తెలిపింది. అయితే ప్రపంచంలోని ప్రస్తుత పరిణామాలకు ఈ పరీక్షలకు ఎలాంటి సంబంధం లేదని స్పష్టం చేసింది.

పసిఫిక్ మహాసముద్రంలోని లక్ష్యాలను ఛేదించే విధంగా రూపొందించిన క్షిపణిని అమెరికా వాయుసేన పరీక్షించింది. ఆయుధాలు లేని మినట్మన్ 3 ఖండాంతర బాలిస్టిక్ క్షిపణిని కాలిఫోర్నియా నుంచి ప్రయోగించినట్లు ఎయిర్​ఫోర్స్ గ్లోబల్ స్ట్రైక్ కమాండ్ వెల్లడించింది.

వాండెన్​బర్గ్ ఎయిర్​ఫోర్స్​ స్థావరం​ నుంచి అర్థరాత్రి 12.21 గంటలకు క్షిపణి ప్రయోగాత్మక పరీక్షలు చేపట్టినట్లు తెలిపింది. అందులోని మూడు రీఎంట్రీ వాహనాలు 4,200 మైళ్లు ప్రయాణించి మార్షల్ దీవులలోని క్వాజలీన్​ అటోల్​ ప్రాంతానికి చేరుకున్నట్లు స్పష్టం చేసింది.

ప్రస్తుతం చేపట్టిన క్షిపణి ప్రయోగాలు సాధారణమైనవేనని ఎయిర్​ఫోర్స్ పేర్కొంది. ప్రపంచ పరిణామాలతో వీటికి సంబంధం లేదని స్పష్టం చేసింది. మినట్మన్ 3 అణ్వాయుధ వ్యవస్థను సుస్థిరం చేయడానికి ఈ ప్రయోగ పరీక్షలు సహకరిస్తాయని 576వ ఫ్లైట్ టెస్ట్ స్క్వాడ్రన్ కమాండర్ కర్నల్ ఒమర్ కోల్​బర్ట్ వెల్లడించారు.