ఏప్రిల్ 1 నుంచి హెచ్​-1బీ వీసాలకు దరఖాస్తు

వచ్చే ఆర్థిక సంవత్సరానికి గాను హెచ్​-1బీ వీసాల కోసం.. నిర్ణీత పరిమితికి సరిపడా ప్రాథమిక ఎలక్ట్రానిక్​ దరఖాస్తులను స్వీకరించినట్టు యూఎస్‌ సిటిజన్‌షిప్‌ అండ్‌ ఇమ్మిగ్రేషన్‌ సర్వీసెస్ వెల్లడించింది. సరైన వివరాలతో ప్రాథమికంగా దరఖాస్తు చేసుకున్నవారు.. ఏప్రిల్​ 1 నుంచి హెచ్​-1బీ వీసా పిటిషన్​కు దరఖాస్తు చేసుకోవచ్చని వెల్లడించింది. అర్హులకు ఇప్పటికే సమాచారమిచ్చినట్లు పేర్కొంది.

హెచ్​-1బీ వీసాలకు సంబంధించి.. 2022 ఆర్థిక సంవత్సరానికి గాను నిర్ణీత పరిమితికి సరిపడా ప్రాథమిక ఎలక్ట్రానిక్​ దరఖాస్తుల స్వీకరణ పూర్తయినట్లు యూఎస్‌ సిటిజన్‌షిప్‌ అండ్‌ ఇమ్మిగ్రేషన్‌ సర్వీసెస్ (యూఎస్‌సీఐఎస్‌) వెల్లడించింది. దరఖాస్తులను పరిశీలించి.. సరైన వివరాలు సమర్పించిన వారికి మాత్రమే వీసా జారీ చేస్తుంది యూఎస్​సీఐఎస్​. పరిమితికి లోబడి ర్యాండమ్​గా ఈ ఎంపిక విధానం ఉంటుంది.

ప్రాథమిక వీసా పిటిషన్​కు ఎంపికైన వారందరికీ ఇప్పటికే సమాచారం కూడా ఇచ్చింది యూఎస్​సీఐఎస్​. ఏప్రిల్ 1 నుంచి వారంతా వీసా పిటిషన్ దాఖలు చేసేందుకు అర్హులని వెల్లడించింది.

అమెరికాలో ఉద్యోగం చేసుకునేందుకు వీలు కలిగించేదే హెచ్‌1బీ వీసా. ఏటా వేల సంఖ్యలో భారతీయులు ఈ వీసాల ద్వారా అమెరికాలో ఉపాధి పొందుతున్నారు. సాధారణ వీసా విభాగంలో గరిష్ట పరిమితి 65 వేలు.. అత్యున్నత విద్యార్హతలు, నైపుణ్యం గలవారికి ఉద్దేశించిన ప్రత్యేక వీసా విభాగంలో 20 వేల దరఖాస్తులు స్వీకరించామని యూఎస్‌సీఐఎస్‌ స్పష్టం చేసింది.

ఇవీ చదవండి:పాస్​పోర్ట్ లేకున్నా ఓసీఐ కార్డ్​ హోల్డర్లకు ఎంట్రీ!