అఫ్గానిస్థాన్ పరిస్థితులపై(Afghanistan news) ప్రవేశపెట్టిన తీర్మానాన్ని ఐక్యరాజ్యసమితి భద్రతా మండలి(యూఎన్ఎస్సీ) ఆమోదించింది. అఫ్గాన్ భూభాగం వేదికగా.. ఇతర దేశాల్లో ఉగ్రవాద కార్యకలాపాలు చేయరాదని, ఉగ్రవాదులకు అఫ్గానిస్థాన్లో ఆశ్రయం ఇవ్వొద్దని తీర్మానించాయి.
భారత్ అధ్యక్షతన..
భారత్ అధ్యక్షతన ఈ సమావేశం జరిగింది. అమెరికా, బ్రిటన్, ఫ్రాన్స్ దేశాలు తీర్మానాన్ని ప్రవేశపెట్టాయి. మండలిలోని 13 దేశాలు తీర్మానాన్ని ఆమోదించాయి. అయితే రష్యా, చైనా మాత్రం ఓటింగ్కు దూరంగా ఉన్నాయి. అఫ్గానిస్థాన్ను ఆగస్టు 15న తాలిబన్లు(Afghnistan Taliban) ఆక్రమించుకున్నారు. దీంతో అఫ్గాన్ అధ్యక్షుడు.. ఆ పదవికి రాజీనామా చేసి యూఏఈలో తలదాచుకున్నారు.
అఫ్గానిస్థాన్ నుంచి అమెరికా, నాటో బలగాల ఉపసంహరణకు గడువు కొద్ది గంటల్లో ముగియనుంది. దేశం విడిచి వెళ్లేందుకు ఆగస్టు 31 చివరి తేదీ కాగా.. ఆ లోపు తమకు సహకరించిన పౌరులను వెనక్కి తీసుకొచ్చేందుకు అమెరికా ప్రయత్నాలు చేస్తోంది.
ఇవీ చదవండి:క్లైమాక్స్కు అమెరికా-అఫ్గాన్ కథ.. డెడ్లైన్కు 24 గంటలే!