ఆపత్కాలంలో భారత్​కు అండగా ఉంటాం: ఐరాస

వరదలతో అతలాకుతలమవుతోన్న అసోం ప్రజలను ఆదుకునేందుకు సిద్ధం ఉన్నట్లు ఐక్యరాజ్యసమితి తెలిపింది. భారత ప్రభుత్వం కోరితే.. సాయం చేసేందుకు ముందుకొస్తామని ఐరాస ప్రధాన కార్యదర్శి ప్రతినిధి స్పష్టం చేశారు. ఇప్పటివరకు రాష్ట్ర వ్యాప్తంగా లక్షలాది మంది నిరాశ్రయులు కాగా, 100 మందికి పైగా మరణించారు.

అసోంను వరదలు ముంచెత్తుతున్నాయి. 26 జిల్లాల్లో వరద ప్రమాద హెచ్చరికలను జారీ చేసింది అక్కడి ప్రభుత్వం. 70 లక్షల మందిపై తీవ్ర ప్రభావం పడింది. ఈ నేపథ్యంలో అస్సామీలకు సాయం చేసేందుకు ముందుకువచ్చింది ఐక్యరాజ్యసమితి. భారత ప్రభుత్వం కోరితే.. అన్ని విధాలా సాయం చేసేందుకు సిద్ధంగా ఉన్నట్లు ఐరాస ప్రధాన కార్యదర్శి ప్రతినిధి వెల్లడించారు.

''భారీ వర్షాల కారణంగా భారత్​లోని​ అసోం, నేపాల్​లలో సుమారు 40 లక్షల మంది నిరాశ్రయులయ్యారు. మరో 189 మంది మృతి చెందినట్లు అధికారుల వల్ల తెలిసింది. అవసరమైతే భారత ప్రభుత్వానికి సాయం చేసేందుకు ఐరాస సిద్ధంగా ఉంది.''

-స్టెఫాన్ డుజారిక్, ఐరాస ప్రధాన కార్యదర్శి ప్రతినిధి

అసోంలో వరదల కారణంగా 85 మంది మృతిచెందారు. కొండచరియలు విరిగిపడిన ఘటనలో మరో 26 మంది మరణించారు.

నేపాల్​కూ చేయూత..

నేపాల్​లోనూ వరద ఉద్ధృతి కొనసాగుతోంది. ఈ నేపథ్యంలో నదీ పరివాహాక ప్రాంతమైన టెరాయ్​ ప్రాంతంలోని ప్రజలను సురక్షిత ప్రాంతాలకు తరలించాలని స్టెఫానీ కోరారు. ఆ దేశ ప్రభుత్వానికీ సాయం చేయనున్నట్లు వెల్లడించారు.

ఇదీ చూడండి:కరోనా కాలంలో కేంద్రం సాధించిన విజయాలివే: రాహుల్​