కరోనా పోరులో భారత్ కృషిని ఐక్యరాజ్యసమితి చీఫ్ ఆంటోనియో గుటెరస్ కొనియాడారు. ప్రపంచ దేశాలకు కరోనా టీకాలను భారత్ పంపిణీ చేస్తుండటం పట్ల సంతోషం వ్యక్తం చేశారు. 2 లక్షల కరోనా టీకాలను ఐరాస శాంతి పరిరక్షుల కోసం ఇవ్వడం పట్ల భారత్కు ధన్యవాదాలు తెలిపారు.
ప్రపంచ దేశాలకు టీకాలను, కరోనా కిట్లను పంపిణీ చేస్తూ భారత్ నాయకత్వ పాత్ర పోషిస్తుందని ఆంటోనియో ప్రశంసించారని ఐరాసలో భారత రాయబారి టీఎస్ తిరుమార్తి అన్నారు. అంతేకాకుండా ఐరాసకు 2లక్షల టీకా డోసులను ఇచ్చినందుకు విదేశాంగ మంత్రి ఎస్ జయశంకర్కు అంటోనియో ధన్యవాదాలు తెలిపినట్లు వెల్లడించారు. కరోనాతో అతలాకుతలమైన ప్రస్తుత సమయంలో భారతదేశ టీకా ఉత్పత్తి సామర్థ్యాలే ప్రపంచానికి ఆస్తి వంటిదని ఐరాస ప్రధాన కార్యదర్శి ఆంటోనియో గుటెరస్ ఇదివరకు ప్రశంసించారు.