కరోనా పోరులో భారత్​ సాయంపై ఐరాస ప్రశంసలు

కరోనాను ఎదుర్కొనేందుకు అమెరికాతో పాటు వివిధ దేశాలకు భారత్ చేసిన సహాయాన్ని ప్రశంసించారు ఐరాస ప్రధాన కార్యదర్శి ఆంటోనియో గుటెరస్​. ఐరాసకు భారత శాశ్వత ప్రతినిధిగా బాధ్యతలు స్వీకరించిన తిరుమూర్తితో కలిసి వీడియో కాన్ఫరెన్స్​లో పాల్గొన్న ఆయన.. ఈ​ సందర్భంగా భారత్​ను కొనియాడారు.

కొవిడ్​-19 మహమ్మారిని ఎదుర్కోవడానికి ఇతర దేశాలకు భారత్​ చేసిన సహాయాన్ని ప్రశంసించారు ఐక్యరాజ్య సమితి ప్రధాన కార్యదర్శి ఆంటోనియో గుటెరస్​. ఐరాసలో భారత రాయబారి టీఎస్​ తిరుమూర్తితో వీడియో కాన్ఫరెన్స్​ సందర్భంగా ఈ మేరకు భారత చర్యలను కొనియాడారని గుటెరస్​ ప్రతినిధి స్టీఫెన్​ డుజారిక్​ తెలిపారు. రాబోయే కాలంలో తిరుమూర్తితో కలిసి పనిచేసేందుకు ఐరాస అధినేత ఆసక్తిగా ఉన్నారని చెప్పారు. భారత కొత్త శాశ్వత ప్రతినిధికి ఐక్యరాజ్యసమితి స్వాగతం పలుకుతోందన్నారు.

గతవారమే ఐరాసకు భారత శాశ్వత ప్రతినిధిగా బాధ్యతలు స్వీకరించారు తిరుమూర్తి. కరోనా వైరస్​ వ్యాప్తి నేపథ్యంలో వర్చువల్​గా తన ఆధారాలను ప్రధాన కార్యాలయానికి సమర్పించారు. ఈ సందర్భంగా గుటెరస్​తో భేటీపై ట్వీట్​ చేశారు తిరుమూర్తి.

" వీడియో కాన్ఫరెన్స్​ ద్వారా ఐరాస ప్రధాన కార్యదర్శి ఆంటోనియో గుటెరస్​ను కలవడం చాలా సంతోషంగా ఉంది. ఈ సందర్భంగా ఆయన భారత పర్యటనలను గుర్తు చేసుకున్నారు. ఐరాసకు భారత ప్రాముఖ్యతను నొక్కి చెప్పారు. కొవిడ్​-19 కాలంలో ఇతర దేశాలకు భారత్​ చేసిన సాయాన్ని ఆయన ప్రశంసించారు."

– టీఎస్​ తిరుమూర్తి, ఐరాసలో భారత శాశ్వత ప్రతినిధి

కరోనా వైరస్​ను ఎదుర్కొనేందుకు అమెరికాతో పాటు వివిధ దేశాలకు అత్యవసరమైన ఔషధాలు, పరీక్ష కిట్లు, ఇతర వైద్య సాయం అందించింది భారత్​.