Ukraine Tension: 'ఉక్రెయిన్​పై రష్యా ఏ రోజైనా దాడి చేయొచ్చు'

Ukraine Tension: ఉక్రెయిన్​పై రష్యా ఏ రోజైనా దాడి చేయవచ్చని అమెరికా పేర్కొంది. ఫలితంగా ఉక్రెయిన్​లో భారీగా ప్రాణనష్టం జరగవచ్చని శ్వేతసౌధం జాతీయ భద్రత సలహాదారు జాక్​ సల్లీవన్ ఆందోళన వ్యక్తం చేశారు.

Ukraine Tension: ఉక్రెయిన్​ సరిహద్దుల్లో ఉద్రిక్తత వాతావరణం నెలకొన్న నేపథ్యంలో కీలక వ్యాఖ్యలు చేశారు అమెరికాలోని శ్వేతసౌధం జాతీయ భద్రత సలహాదారు జాక్​ సల్లీవన్​. ఉక్రెయిన్​పై రష్యా ఏ రోజైనా దాడి చేయవచ్చని హెచ్చరించారు. ఫలితంగా భారీగా ప్రాణనష్టం జరిగే అవకాశముందని జాక్​ ఆందోళన వ్యక్తం చేశారు. అయితే అందుకు తగిన సన్నాహాలు, ప్రతిస్పందనపై నష్ట తీవ్రత ఆధారపడి ఉటుందన్నారు.

అంతకుముందే.. ఉక్రెయిన్​పై దాడి చేసేందుకు రష్యా సిద్ధమవుతోందని.. ఈ మేరకు 70 శాతం ఆయుధ సామగ్రిని సమకూర్చుకుందని అధ్యక్షుడు జో బైడెన్​ సీనియర్ సలహాదారు హెచ్చరించారు. ఆ మరుసటి రోజే జాక్​ ఈ తీవ్ర హెచ్చరిక చేశారు. అయితే ఉక్రెయిన్​ను త్వరితగతిన స్వాధీనం చేసుకోవడానికి రష్యా ప్రయత్నిస్తోందని.. ఇది 50,000 మంది ప్రాణనష్టానికి దారితీస్తుందని శ్వేతసౌధం చట్టసభ సభ్యులకు వివరించిన నివేదికలను సల్లీవన్ నేరుగా ప్రస్తావించలేదు.

ఉక్రెయిన్ సరిహద్దుల్లో పరిస్థితులు, పరిణామాలు ఆధారంగా.. రష్యా రాబోయే కొన్నివారాల్లో దాడి ప్రారంభించాలని భావిస్తున్నట్లు సూచించే నివేదికను రూపొందించారు అమెరికా అధికారులు. అయితే దౌత్యపరమైన చర్చల ద్వారా సమస్యను పరిష్కారించవచ్చని పేర్కొన్నారు.

ఇదీ చూడండి:రష్యాలో రికార్డు స్థాయి కరోనా కేసులు- 10 రెట్లు అధికం!