'యుద్ధ ప్రకటన'పై అమెరికా ఫైర్.. బాధ్యత రష్యా​దేనన్న బైడెన్

రష్యా యుద్ధ ప్రకటనపై అమెరికా స్పందించింది. ఈ దాడుల వల్ల జరిగే నష్టానికి బాధ్యత రష్యాదేనని పేర్కొంది. దీనిపై మిత్ర దేశాలతో కలిసి చర్చించి నిర్ణయాత్మకంగా స్పందిస్తామని అమెరికా అధ్యక్షుడు జో బైడెన్ తెలిపారు.

ఉక్రెయిన్​పై సైనిక చర్య చేపడుతున్నట్లు పుతిన్ చేసిన ప్రకటనపై అమెరికా తీవ్రంగా స్పందించింది. రష్యా దాడుల వల్ల జరిగే విధ్వంసం, ప్రాణనష్టానికి ఆ దేశానిదే పూర్తి బాధ్యత అని పేర్కొంది. రష్యా యుద్ధాన్ని కోరుకుందని.. అమెరికా తన మిత్ర దేశాలతో కలిసి ఐకమత్యంతో దీనిపై నిర్ణయాత్మకంగా స్పందిస్తుందని అధ్యక్షుడు జో బైడెన్ పేర్కొన్నారు. రష్యాను ప్రపంచం బాధ్యుల్ని చేస్తుందని స్పష్టం చేశారు.

"ఉక్రెయిన్​తో పాటు ప్రపంచ దేశాల ప్రజల కోసం ప్రార్థిస్తున్నా. ఈ రాత్రి ఉక్రెయిన్ ప్రజలు రష్యా సైనిక దాడులకు బాధితులుగా మారుతున్నారు. రష్యా అధ్యక్షుడు పుతిన్ యుద్ధాన్ని కోరుకున్నారు. ఇది తీవ్ర ప్రాణనష్టానికి దారితీస్తుంది. పరిస్థితిని ఎప్పటికప్పుడు సమీక్షిస్తున్నాం. రేపు జీ7 దేశాధినేతలతో చర్చిస్తాం. నాటో భాగస్వామ్య పక్షాలతో సమన్వయం చేసుకుంటాం."

-జో బైడన్, అమెరికా అధ్యక్షుడు

ఉక్రెయిన్​లో సైనిక ఆపరేషన్ చేపట్టనున్నట్లు రష్యా అధ్యక్షుడు వ్లాదిమిర్ పుతిన్ ప్రకటించారు. పౌరులను కాపాడేందుకే ఈ చర్యలు చేపడుతున్నట్లు చెప్పుకొచ్చారు. ప్రజలను ఉద్దేశించి టెలివిజన్​ ద్వారా ప్రసంగించిన పుతిన్.. ఉక్రెయిన్ నుంచి ఎదురవుతున్న ముప్పుకు స్పందనగానే తాము ఈ నిర్ణయం తీసుకున్నట్లు తెలిపారు.

ఇదీ చదవండి:ఉక్రెయిన్​పై యుద్ధం ప్రకటించిన పుతిన్.. కీవ్​లో పేలుడు