ప్రతినిధుల సభలో ప్రవేశపెట్టిన 'చైనాపై ఆంక్షల బిల్లు'పై స్పందించారు అమెరికా అధ్యక్షుడు డొనాల్డ్ ట్రంప్. ఈ బిల్లుపై ఇంకా దృష్టి పెట్టలేదని.. త్వరలోనే పరిశీలిస్తానని ట్రంప్ స్పష్టం చేశారు.
కరోనా వ్యాప్తి విషయంలో అంతర్జాతీయ దర్యాప్తునకు చైనా సహకరించకపోతే దానిపై ఆంక్షలు విధించే అధికారం అధ్యక్షుడికి కల్పించాలని ఈ బిల్లు చెబుతోంది. 'ద కొవిడ్- 19 అకౌంటబిలిటీ యాక్ట్' బిల్లును లిండ్సే గ్రహమ్ నేతృత్వంలోని 9 మంది సెనేటర్ల బృందం ప్రతినిధుల సభలో మంగళవారం సమర్పించింది.
ఈ బిల్లును కాంగ్రెస్ సభ్యుడు డౌగ్ కొలిన్స్ ప్రతినిధుల సభలో బుధవారం ప్రవేశపెట్టారు. దీనికి 24 మందికిపైగా చట్టసభ్యులు మద్దతు తెలిపారు.
"అమెరికాకు దశాబ్దాలుగా చైనా కమ్యూనిస్టు పాలన హాని తలపెట్టేందుకు ప్రయత్నిస్తోంది. కరోనా వైరస్ సంక్షోభం ఈ ప్రక్రియలో తారస్థాయికి చేరింది. దీనిని మార్చాల్సిన అవసరం ఎంతైనా ఉంది. లక్షల మందిని బలి తీసుకున్న కరోనా వైరస్ వ్యాప్తికి సంబంధించి చైనా కప్పిబుచ్చే ప్రయత్నం చేస్తోంది. ఇందుకు చైనా తప్పనిసరిగా బాధ్యత వహించాలి. "
- డౌగ్ కొలిన్స్, చట్ట సభ్యుడు
ఈ మేరకు మహమ్మారి వ్యాప్తిలో చైనా చర్యలకు సంబంధించి నిఘా సమాచారాన్ని అందివ్వాలని హోంల్యాండ్ సెక్యురిటీ శాఖ(డీహెచ్ఎస్)ను కాంగ్రెస్ సభ్యులు కోరారు. చైనా ప్రభుత్వాన్ని నమ్మలేమని.. నిజానిజాలేంటో తెలుసుకునేందుకు అమెరికా నిఘా విభాగంపైనే తమకు పూర్తి విశ్వాసముందని కాంగ్రెస్ సభ్యుడు, డీహెచ్ఎస్ నిఘా, ఉగ్రవాద వ్యతిరేక విభాగం చీఫ్ మ్యాక్స్ రోజ్ అన్నారు.
ఈ బిల్లు అమల్లోకి వస్తే..
అమెరికా దాని మిత్ర దేశాలు లేదా ఐరాస అనుబంధ సంస్థలతో కరోనా వ్యాప్తికి సంబంధించి ఏదైనా విచారణకు చైనా అంగీకరించాలి. ఈ విచారణలో తేలిన విషయాలకు చైనా జవాబుదారీగా ఉండాలి. వైరస్ వ్యాప్తికి కారణమవుతోన్న చైనాలోని అన్ని వెట్ మార్కెట్లు (వన్యప్రాణి మాంస విక్రయశాలలు) మూసివేయాలి. అమెరికా అధ్యక్షుడి ధ్రువీకరణ తర్వాత విచారణకు సంబంధించి పూర్తి వివరాలు అమెరికా కాంగ్రెస్కు సమర్పించాలి. ఈ తతంగమంతా 60 రోజులలోపు జరగాలి.
ఒకవేళ ఈ ప్రక్రియలో విఫలమైతే చైనాపై ఆంక్షలు విధించేందుకు అమెరికా అధ్యక్షుడికి అధికారం లభిస్తుంది. ఆస్తులను స్తంభింపజేయటం, ప్రయాణాలపై నిషేధం, వీసా రద్దు, చైనా వ్యాపారాలకు అమెరికా బ్యాంకుల రుణాల నిరాకరణ, అమెరికా స్టాక్ ఎక్స్ఛేంజీల నుంచి చైనా కంపెనీల తొలగింపు వంటి చర్యలు తీసుకోవచ్చు.
ఇదీ చూడండి:అమెరికా చట్టసభలో చైనాపై ఆంక్షల బిల్లు
