అమెరికా ఎన్నికలు దగ్గపడుతున్న తరుణంలో భారతీయ అమెరికన్‌ ఓటర్లను ఆకట్టుకునేందుకు డెమొక్రటిక్ పార్టీ అధ్యక్ష అభ్యర్థి జో బైడెన్ ప్రయత్నిస్తున్నారు. ఈ మేరకు భారతీయులు, భారత్ పట్ల ఆయనకున్న మక్కువను తెలిజేస్తూ ఓ ప్రధాన పత్రికలో వ్యాసం రాశారు. భారత సంతతికి చెందిన ఉపాధ్యక్ష అభ్యర్థి కమలా హ్యారిస్‌ గొప్పతనాన్ని ఈ సందర్భంగా బైడెన్ హైలైట్‌ చేసే ప్రయత్నం చేశారు.
పెద్దలు, కుటుంబ సభ్యుల పట్ల గౌరవం, ప్రతిఒక్కరినీ గౌరవించడం, స్వీయ క్రమశిక్షణ, సేవ, కష్టపడేతత్వం వంటి లక్షణాలు భారతీయ అమెరికన్లను తనకు దగ్గర చేశాయని జో బైడెన్ తెలిపారు. అమెరికాలో మెరుగైన జీవితం కోసం ఐర్లాండ్‌ నుంచి వచ్చిన తన పూర్వీకుల నుంచి తనకూ ఈ విలువలు అందాయని చెప్పారు. ఆ విలువలే తనని ఉత్తమ వ్యక్తిగా తీర్చిదిద్దాయని చెప్పుకొచ్చారు. తాను ఉపాధ్యక్షుడిగా ఉన్న సమయంలో తన నివాసంలో జరిపిన దీపావళి వేడుకను ఈ సందర్భంగా బైడెన్ గుర్తుచేసుకున్నారు. అమెరికాలో ఉన్న దాదాపు రెండు మిలియన్ల మంది భారతీయ అమెరికన్‌ ఓటర్లను బైడెన్ లక్ష్యంగా చేసుకున్నారు. ఉత్తర కరోలినా, వర్జీనియా, పెన్సిల్వేనియా, మిషిగన్‌, జార్జియా, టెక్సాస్‌ రాష్ట్రాల్లో ఇండియన్‌ అమెరికన్‌ ఓటర్లు ఎక్కువగా ఉండడం గమనార్హం.
అధ్యక్షుడి తీరుతో తీరని నష్టం..
ఇక్కడి భారతీయులతో తనకు గాఢమైన అనుబంధం ఉందని బైడన్‌ అన్నారు. వారి విలువలు, తమ విలువలతో సరిపోలతాయని వివరించారు. ఇక విలువలే లేని డొనాల్డ్ ట్రంప్ వ్యక్తిత్వం కారణంగా.. అమెరికా తామందరం కలలుకన్న మాదిరిగా లేకుండా పోయిందని అయన విచారం వ్యక్తంచేశారు. మహమ్మారి కరోనా విషయంలో కూడా అధ్యక్షుడు అనాలోచితంగా వ్యవహరించి.. డాక్టర్‌ ఫౌచీ వంటి నిపుణుల సూచనలను పెడచెవిన పెట్టారన్నారు. దీంతో పరిస్థితి తీవ్రంగా మారి.. అనేక మంది అమెరికన్లు ప్రాణాలు, ఉపాధిని కోల్పోయారన్నారు.
కమలా హారిస్పై ప్రశంసలు..