'ఇరాన్​ వద్ద ఇక అణ్వాయుధాలు ఉండనివ్వను'

అమెరికా-ఇరాన్​ మధ్య ఉద్రిక్తతలు కొనసాగుతున్నాయి. ఇప్పటికే ఇరాన్​ను పలుమార్లు హెచ్చరించిన అగ్రరాజ్యం అధ్యక్షుడు డొనాల్డ్​ ట్రంప్​ తాజాగా మరో ట్వీట్​ చేశారు. ఇరాన్​కు ఇక అణ్వాయుధాలు సమకూరనివ్వను అని పేర్కొన్నారు ట్రంప్.

ఇరాన్​ రెండో అతి శక్తిమంతమైన వ్యక్తి ఖాసిం సులేమానీని అమెరికా హతమార్చిన అనంతరం పశ్చిమాసియాలో పరిస్థితులు వేగంగా మారుతున్నాయి. అమెరికా భారీ మూల్యం చెల్లించుకోక తప్పదని ఇరాన్​ హెచ్చరిస్తోన్న నేపథ్యంలో అగ్రరాజ్యం అధ్యక్షుడు ట్రంప్​ మరోసారి దూకుడు ప్రదర్శించారు.

ఇరాన్​ ​వద్ద ఇక అణ్వాయుధాలు ఉండనివ్వకుండా చేస్తామంటూ ట్రంప్​ తాజాగా ట్వీట్​ చేశారు. 2015లో ఇరాన్​తో అణు ఒప్పందం నుంచి ట్రంప్​ వైదొలిగిన నాటి నుంచి ఇరు దేశాల మధ్య ఉద్రిక్తతలు పెరిగాయి. సులేమానీ మరణంతో ఇవి తారస్థాయికి చేరాయి.

ట్రంప్​ అధికారాలకు చెక్​..!

అటు అమెరికాలో డెమోక్రాట్లు... అధ్యక్షుడు ట్రంప్​పై ఆగ్రహంగా ఉన్నారు. అధ్యక్షుడికి ఉన్న అమితమైన సైన్యాధికారాలను తగ్గించేందుకు పావులు కదుపుతున్నారు. కాంగ్రెస్​లో ఈ మేరకు ప్రతిపాదించి ఓటింగ్​ నిర్వహించేందుకు సిద్ధమవుతున్నారు. ఈ మేరకు తీర్మానాన్ని ప్రవేశపెట్టి ఓటింగ్​కు తీసుకొచ్చే ప్రణాళికను స్పీకర్​ నాన్సీ పెలోసీ ప్రకటించారు.

ఇరాన్​ టాప్​ జనరల్​ ఖాసిం సులేమానీని హతమార్చేందుకు ట్రంప్​ ఆదేశాలివ్వడమే ఇందుకు కారణం.