శ్వేతసౌధాన్ని వీడాక.. తొలిసారి ట్రంప్​ ప్రసంగం

అమెరికా మాజీ అధ్యక్షుడు డొనాల్డ్​ ట్రంప్​ శ్వేతసౌధం వీడాక.. తొలిసారి ఓ కార్యక్రమానికి హాజరుకానున్నట్టు సమాచారం. ఈ వార్షిక సమావేశంలో రిపబ్లికన్​ పార్టీ భవిష్యత్తు సహా.. బైడెన్​ పాలనా విధానం గురించి ట్రంప్​ ప్రసంగించే అవకాశమున్నట్టు తెలుస్తోంది.

అమెరికా అధ్యక్ష పదవి వీడాక.. తొలిసారి ఓ సమావేశంలో పాల్గొననున్నారు డొనాల్డ్​ ట్రంప్. ఆయన ఫ్లొరిడాలో ఈ నెల 28న జరిగే ఓ సంప్రదాయవాద సమావేశానికి హాజరుకానున్నారని అమెరికన్​ కన్సర్వేటివ్​ యూనియన్​ ప్రతినిధి ఇయాన్​ వాల్టర్స్​ తెలిపారు. ఇదే జరిగితే శ్వేతసౌధం ఆవల.. ట్రంప్​ తొలిసారి మాట్లాడినట్లవుతుంది.

తన రాజకీయ వృద్ధిలో కీలకపాత్ర పోషించిన 'కన్సర్వేటివ్​ పొలిటికల్​ ఆక్షన్​ కాన్ఫరెన్స్​(సీపీఏసీ)'తో సుదీర్ఘ చరిత్ర కలిగి ఉన్న ట్రంప్​.. దాని వార్షిక సమావేశానికి హాజరుకానున్నట్టు సమాచారం. ఈ కార్యక్రమంలో ఆయన రిపబ్లికన్​ పార్టీ భవిష్యత్తు గురించి ప్రసంగిస్తారని అందరూ భావిస్తున్నారు. అంతేకాకుండా.. తన ఇమ్మిగ్రేషన్​ విధానాలను ప్రస్తుత అధ్యక్షుడు జో బైడెన్​ రద్దు చేయడంపై కూడా ట్రంప్​ విమర్శనాస్త్రాలు చేసే అవకాశమున్నట్టు తెలుస్తోంది.

ఈ కార్యక్రమంలో విదేశాంగ మాజీమంత్రిమైక్​ పాంపియో సహా.. ఫ్లొరిడా, సౌత్ డకోటా పాలనాధికారులు పాల్గొననున్నారు.

ఇదీ చదవండి:'2024లో పోటీ గురించి ఇప్పుడే ఏం చెప్పలేను'