కరోనా వైరస్ వ్యాక్సిన్ను ఈ ఏడాది చివరి నాటికి అభివృద్ధి చేసి, పంపిణీ చేయాలన్న లక్ష్యంలో భాగంగా కీలక నిర్ణయం తీసుకున్నారు అమెరికా అధ్యక్షుడు డొనాల్డ్ ట్రంప్. ఈ మేరకు వ్యాక్సిన్ తయారీ స్వతంత్ర బృందం 'ఆపరేషన్ వార్ప్ స్పీడ్'కు నాయకత్వం వహించేందుకు మాజీ ఫార్మాసిటికల్ ఎగ్జిక్యూటివ్ను నియమించారు.
కరోనా వైరస్ కార్యదళంలోని స్వతంత్ర బృందం 'ఆపరేషన్ వార్ప్ స్పీడ్' కు నాయకుడిగా మోన్సెఫ్ స్లౌయిని నియమించినట్లు అధికార వర్గాలు తెలిపాయి.
" గ్లాక్సో స్మిత్క్లైన్ ఫార్మా సంస్థ మాజీ కార్యనిర్వాహణ అధికారి మోన్సెఫ్ స్లౌయి.. ఆపరేషన్ వార్ప్ స్పీడ్కు నాయకత్వం వహిస్తారు. కొవిడ్-19 కోసం వ్యాక్సిన్ అభివృద్ధి చర్యలను వేగవంతం చేసేందుకుగాను అధ్యక్షుడు ట్రంప్ ఈ నిర్ణయం తీసుకున్నారు. స్లౌయి స్వచ్ఛందంగా పని చేయనున్నారు. ఆయనకు అమెరికా ఆర్మీ జనరల్ గుస్టావ్ పెర్నా సాయం చేస్తారు."
– శ్వేతసౌధం అధికారి
కరోనా వైరస్ వ్యాక్సిన్ అభివృద్ధికి శాస్త్రవేత్తలు అంచనా వేస్తున్న సమయానికి ముందే టీకా తయారు చేయాలనే లక్ష్యంతోనే ఈ నిర్ణయం వెలువడినట్లు తెలుస్తోంది. ఆర్థిక వ్యవస్థ పుంజుకునేందుకు వ్యాక్సిన్ ఒక్కటే మార్గంగా విశ్వసిస్తోంది ట్రంప్ ప్రభుత్వం. ఈ ఏడాది చివరి నాటికి 300 బిలియన్ల డోస్లను పంపిణీ చేయాలనే లక్ష్యంతో ఉంది.
