'ట్రంప్​ 2.0 ప్రమాణ స్వీకారానికి భారీ ఏర్పాట్లు!'

జనవరి 20న అమెరికా అధ్యక్ష పదవిని చేపట్టనున్నారు జో బైడెన్​. అయితే అదే రోజున అధ్యక్షుడు ట్రంప్​ చేత రెండోసారి ప్రమాణస్వీకారం చేయించేందుకు సన్నద్ధమవుతున్నారు ఆయన మద్దతుదారులు. వర్చువల్​గా ఓ కార్యక్రమం ఏర్పాటు చేసేందుకు ప్రణాళిక రచిస్తున్నారు. ఈ వేడుకలపై 60వేల మందికిపైగా ఆసక్తి చూపించడం విశేషం.

అమెరికా అధ్యక్ష ఎన్నికల అంశం ఓ ముగిసిన కథ. జో బైడెన్​ను అధ్యక్షుడిగా ఎలక్టోరల్​ కాలేజీ కూడా అధికారికంగా ధ్రువీకరించింది. అయినప్పటికీ అధ్యక్షుడు డొనాల్డ్​ ట్రంప్​ తన ఓటమిని అంగీకరించడం లేదు. తానే గెలిచానని ఇప్పటికీ వాదిస్తున్నారు. ఎన్నికల్లో అవకతవకలు జరిగాయని ఆరోపిస్తూ కోర్టుల చుట్టూ తిరుగుతున్నారు. అయితే ట్రంప్​ మద్దతుదారులు కూడా ఇదే విధంగా ప్రవర్తిస్తున్నారు. తాజాగా.. జో బైడెన్​ అధ్యక్ష బాధ్యతలను స్వీకరించే రోజే.. ట్రంప్​ చేత ప్రమాణ స్వీకారం చేయించేందుకు సన్నద్ధమవుతున్నారు.

వర్చువల్​ వేడుకలు..

వచ్చే జనవరి 20న బైడెన్​.. అమెరికా పగ్గాలను చేపట్టనున్నారు. అయితే అదే రోజున ట్రంప్​తో​ రెండోసారి ప్రమాణస్వీకారానికి ఏర్పాట్లు చేస్తున్నారు ఆయన మద్దతుదారులు. వర్చువల్​గా ఈ వేడుకను జరపడానికి ప్రణాళికలు రచిస్తున్నారు. "డొనాల్డ్​ జే ట్రంప్​. 2వ ప్రెసిడెన్షియల్​ ఇనాగరేషన్​ సెర్మనీ"కి హాజరయ్యేందుకు.. ఫేస్​బుక్​లో 60వేలకుపైగా మంది ఉత్సాహం చూపించారు.

ఇదీ చూడండి:-నిరాడంబరంగానే బైడెన్, హారిస్​​​ ప్రమాణం

జనవరి 20న స్థానిక కాలమానం ప్రకారం మధ్యాహ్నం 12గంటలకు ఈ కార్యక్రమం ఉండనుంది. ట్రంప్​ ఎన్నికల ప్రచారాల్లో పాల్గొన్న ఇలిర్​ చామి, ఇవి కొకాలారి ఈ వేడుకను నిర్వహించనున్నారు.

అయితే ఎఫ్​బీ పోస్ట్​ కింద.. ఓ డిస్​క్లైమర్​ను జోడించారు. " 3,25,000మందితో కూడిన వ్యక్తిగత బృందం మాది. మేము ట్రంప్​ మద్దతుదారులం. ఈ విధంగా ట్రంప్​కు మద్దతిస్తున్నాం. అధికారిక అధ్యక్షుడి ప్రమాణస్వీకారంతో మాకు, ఈ వేడుకకు సంబంధం లేదు," అని పోస్ట్​ చేశారు. ఎఫ్​బీ కూడా ఇదే తరహాలో కింద మరో డిస్​క్లైమర్​ను జోడించింది. "అధ్యక్ష ఎన్నికల విజేత జో బైడెన్​. జనవరి 20న.. దేశ 46వ అధ్యక్షుడిగా ఆయన ప్రమాణస్వీకారం చేస్తారు" అని పేర్కొంది.

ఇదీ చూడండి:-సొంతింటికి వెళ్లేందుకూ ట్రంప్​కు ఇక్కట్లు!