'ఎన్నికల్లో ఓటమిని అంగీకరించేది లేదు'​

అగ్రరాజ్య అధ్యక్ష పదవిని వీడేందుకు ఇష్టపడని డొనాల్డ్​ ట్రంప్​.. డెమొక్రాటిక్​ పార్టీపై మరోమారు విమర్శలు గుప్పించారు. ఆ పార్టీ తమ ఎన్నికలను తస్కరించిందని వ్యాఖ్యానించారు. వాషింగ్టన్​ డీసీలోని తమ పార్టీ మద్దతుదారుల సమావేశంలో గంటకుపైగా ప్రసంగించిన ఆయన.. ఈ ఎన్నికల్లో తాము భారీ మెజారిటీతో గెలుపొందినట్టు చెప్పుకొచ్చారు.

అమెరికాలో ఇటీవల జరిగిన సార్వత్రిక ఎన్నికలను తాను అంగీకరించట్లేదని ఆ దేశ అధ్యక్షుడు డొనాల్డ్​ ట్రంప్​ అన్నారు. అధ్యక్షుడిగా ఎన్నికైన ప్రత్యర్థి జో బైడెన్​(డెమొక్రాటిక్ పార్టీ అభ్యర్థి) ఇందులో చోరీకి పాల్పడ్డారని ఆరోపించారు ట్రంప్. ఈ మోసాన్ని ఖండించాలని కోరుతూ.. వాషింగ్టన్​ డీసీలో జరిగిన సమావేశంలో వేలాది మంది మద్దతుదారులను ఉద్దేశించి ఈ వ్యాఖ్యలు చేశారు ట్రంప్​.

'ర్యాడికల్​ లెఫ్ట్​ డెమొక్రాట్లు దొంగలించిన ఈ ఎన్నికల విజయాన్ని చూసేందుకు మేము ఇష్టపడం. నకిలీ ప్రసార మాధ్యమాల ద్వారా వారు మా విజయాన్ని తస్కరించారు. వారేం చేశారో? ఏం చేస్తున్నారో? అలాంటివేవీ జరగవు. ఈ ఓటమిని మేము అంగీకరించేది లేదు.' అని ఎన్నికల ఫలితాలకు నిరసనగా దేశంలోని వివిధ ప్రాంతాల నుంచి తరలివచ్చిన ప్రజల సమక్షంలో అన్నారు ట్రంప్​.

ఎలక్టోరల్​ కాలేజీ ఓట్ల లెక్కింపు, ధ్రువీకరించేందుకు కాంగ్రెస్​ సంయుక్త సమావేశానికి కొద్ది గంటల ముందు ట్రంప్​ ఈ మేరకు వ్యాఖ్యానించారు. సుమారు గంటకుపైగా సాగిన సుదీర్ఘ ప్రసంగంలో.. ఈ ఎన్నికల్లో తాము ఘన విజయం సాధించామని పునరుద్ఘాటించారు ట్రంప్​.

ఇదీ చదవండి:యూఎస్​ కాంగ్రెస్​ వద్ద తుపాకుల మోత