'పారిస్ పర్యావరణ ఒప్పందం 2015'.. పారిశ్రామికీకరణతో వేడెక్కుతోన్న భూగోళాన్ని రక్షించేందుకు.. ఏర్పాటు చేసుకున్న ఒప్పందం. ఈ ఒప్పందంపై దాదాపు 200 దేశాలు సంతకాలు చేశాయి. అప్పటి అమెరికా అధ్యక్షుడు బరాక్ ఒబామా ఈ ఒప్పందానికి అంగీకారం తెలిపారు. 2016 నవంబర్ 4 నుంచి ఇది అమలులోకి వచ్చింది.
అయితే డొనాల్డ్ ట్రంప్ అధ్యక్ష బాధ్యతలు స్వీకరించాక... ఈ ఒప్పందం భారత్, చైనాలకు అనుకూలంగా ఉందని, అమెరికా ప్రయోజనాలకు తీవ్ర నష్టం కలిగిస్తుందని ట్రంప్ ఆరోపించారు. ఈ ఒప్పందం నుంచి వైదొలుగుతున్నట్లు ప్రకటించారు. అయితే ఒప్పందం ప్రకారం సంతకం చేసిన ఏ దేశమూ.. 3 ఏళ్ల వరకు వైదొలగడానికి ఆస్కారం లేదు.
నేటితో ఆ సమయం ముగియడం వల్ల ఒప్పందం నుంచి వైదొలిగే ప్రక్రియను అమెరికా మొదలుపెట్టే అవకాశం ఉంది. అయితే ఇందుకోసం ముందుగా ఐరాసకు లేఖ రాయాలి. ఈ ప్రక్రియ ముగియడానికి ఏడాది సమయం పట్టొచ్చు. ఈ లోపు 2020 అమెరికా అధ్యక్ష ఎన్నికలు అయిపోతాయి. అయితే ఎన్నికల్లో ట్రంప్ కాకుండా.. మరెవరైనా అధ్యక్షుడిగా ఎన్నికైతే.. వారి నిర్ణయం మేరకు 30 రోజుల్లో తిరిగి ఒప్పందంలో చేరవచ్చు.