డొనాల్డ్ ట్రంప్.. అమెరికా అధ్యక్ష ఎన్నికల్లో ఓటమి పాలైన నేత. అయినా ఇప్పటికీ ట్రంప్ పేరు రోజూ వార్తల్లో వస్తూనే ఉంటుంది. తాజాగా ట్రంప్ అభిశంసనపై సెనేట్ విచారణ ప్రారంభించింది. అయితే ఈ విచారణలో ట్రంప్ తరఫు న్యాయవాదుల వాదన మాజీ అధ్యక్షుడికి షాక్ ఇచ్చింది. ఇప్పటివరకు అధ్యక్ష ఎన్నికల్లో తాను ఓడిపోయినట్లు ట్రంప్ ఒప్పుకున్న సందర్భమే లేదు. అయితే ట్రంప్ లాయర్లు మాత్రం అధ్యక్ష ఎన్నికల్లో ట్రంప్ ఘోరంగా ఓడిపోయారని.. బైడెన్ను ప్రజలు ఎన్నుకున్నారని వాదిస్తున్నారు.
"అమెరికా ప్రజలు తమ గళం వినిపించారు. అధికార యంత్రాంగాన్ని మార్చారు. పాత ప్రభుత్వం నచ్చకపోతే కొత్త సర్కార్ను ఎన్నుకోవచ్చు. వారు అదే చేశారు. ఇప్పుడు ట్రంప్ను అభిశంసించడం కుదరదు. ఎందుకంటే అధికారంలో లేని వ్యక్తిని మీరు ఎలా అభిశంసిస్తారు. పదవి నుంచి తప్పించడమే అభిశంసన ప్రక్రియలో అతి పెద్ద శిక్ష అని రాజ్యాంగం చెబుతోంది. మరి అసలు పదవిలో లేని వ్యక్తిని మీరు ఎలా శిక్షిస్తారు? ఆ పని ఓటర్లు ఇప్పటికే చేశారు."
- బ్రూస్ కాస్టర్, ట్రంప్ తరఫు న్యాయవాది
సెనేట్లో జరిగిన ఈ విచారణను ఫ్లోరిడా క్లబ్లో ట్రంప్ వీక్షించినట్లు ఆయన సన్నిహితులు తెలిపారు. ఆయన తరఫున వాదిస్తోన్న న్యాయవాది మాటలు విని ట్రంప్ ఆగ్రహంతో ఊగిపోయినట్లు సమాచారం. క్యాపిటల్ ఘటనలో ట్రంప్ తన మద్దతుదారులకు ఆదేశాలు జారీ చేస్తున్నట్లుగా ఉన్న దృశ్యాలు, దాడి చిత్రాలను సభలో డెమొక్రాట్లు ప్రసారం చేశారు. వీటిని చూసిన ట్రంప్.. వారితో పోలిస్తే తన లాయర్ల వాదనలో ఎంతమాత్రం పస లేదని చెప్పినట్లు ఆయన సన్నిహితులు తెలిపారు.