హెచ్​1బీ వీసాల రద్దుపై 2 రోజుల్లో నిర్ణయం!

అమెరికా వెళ్లాలనుకునే భారతీయ ఐటీ నిపుణులకు నిరాశ కల్గించే నిర్ణయం తీసుకోనున్నారు అధ్యక్షుడు డొనాల్డ్​ ట్రంప్​. హెచ్​1బీ సహా వివిధ తాత్కాలిక ఉపాధి వీసాలను రద్దుచేయనున్నారు. రెండు రోజుల్లోగా ఈ విషయంపై అధికారిక ప్రకటన వెలువడుతుందని శ్వేతసౌధం అధికారిక వర్గాలు తెలిపాయి.

వేలాది మంది భారతీయుల కలల్ని నీరాగార్చే నిర్ణయం తీసుకోనున్నారు అగ్రరాజ్యం అధ్యక్షుడు డొనాల్డ్ ట్రంప్​. హెచ్​1బీ వీసాలను ఈ ఏడాది చివరి వరకు తాత్కాలికంగా రద్దు చేసే ఉత్తర్వులపై ఆయన సంతకం చేయనున్నట్లు శ్వేతసౌధం అధికారిక వర్గాలు తెలిపాయి. ఒకటి, రెండు రోజుల్లోగా వీసాల జారీకి సంబంధించి కీలక ప్రకటన ఉంటుందని ఫాక్స్ న్యూస్​తో ఇప్పటికే సూచనప్రాయంగా చెప్పారు ట్రంప్​.

కరోనా సంక్షోభం కారణంగా నిరుద్యోగం రికార్డు స్థాయిలో పెరిగిన నేపథ్యంలో అమెరికన్లకు అవకాశాలు కల్పించాలనే ట్రంప్ ఈ నిర్ణయం తీసుకుంటున్నారు. అయితే ఇప్పటికే అమెరికాలో పని చేస్తున్న ఐటీ ఉద్యోగులపై ఎలాంటి ప్రభావం ఉండబోదని అధికారిక వర్గాలు స్పష్టం చేశాయి.

70 శాతం మంది భారతీయులే...

అమెరికా ఏటా 85వేల హెచ్​1బీ వీసాలు జారీ చేస్తోంది. వీటిలో దాదాపు 70శాతం భారతీయ ఐటీ నిపుణులకే దక్కుతున్నాయి. ట్రంప్​ తాజా నిర్ణయం వీరిపై తీవ్ర ప్రభావం చూపనుంది.

హెచ్​1బీతో పాటు తాత్కాలిక ఉపాధి వీసాలు హెచ్​-2బీ, జే-1, ఎల్​-1 వీసాలను కూాడా రద్దు చేసే ఆలోచనలో ట్రంప్ ఉన్నట్లు తెలుస్తోంది.

ఇదీ చూడండి: భారత్​, చైనాల మధ్య క్లిష్ట పరిస్థితులు: ట్రంప్​