గెలవకపోతే గవర్నర్​ను తొలగిస్తా: ట్రంప్​

అమెరికా అధ్యక్ష ఎన్నికల్లో భాగంగా జార్జియాలోని మకోన్​లో నిర్వహించిన ప్రచార కార్యక్రమంలో అధ్యక్షుడు డొనాల్డ్​ ట్రంప్ పాల్గొన్నారు​. ఫ్లోరిడాలో గెలవకపోతే.. ఆ రాష్ట్ర గవర్నర్​, రిపబ్లికన్​ నేత రాన్​ డిసాంటిస్​ను తొలగిస్తానంటూ చమత్కరించారు​. ఆయన తనకు మంచి స్నేహితుడిగా పేర్కొన్నారు.

అమెరికా అధ్యక్ష ఎన్నికలు దగ్గర పడుతున్న క్రమంలో ప్రచార పర్వం ఊపందుకుంది. తన ప్రసంగాలతో ఓటర్లను ఆకట్టుకునే ప్రయత్నం చేస్తున్నారు అధ్యక్షుడు డొనాల్డ్​ ట్రంప్. ఈ క్రమంలోనే.. ఫ్లోరిడాలో గెలవకపోతే ఆ రాష్ట్ర గవర్నర్, రిపబ్లికన్​ నేత​ రాన్​ డిసాంటిస్​ను తొలగిస్తానని చమత్కరించారు ట్రంప్​.

శుక్రవారం రాత్రి జార్జియాలోని మకోన్​​లో జరిగిన ప్రచార కార్యక్రమంలో ఈ మేరకు ట్రంప్​ వ్యాఖ్యానించినట్లు ద హిల్​ న్యూస్​ వెబ్​సైట్​ పేర్కొంది.

" ఆయన గొప్ప పని చేశారు, నాకు మంచి స్నేహితుడు. రాన్​, మనం ఈ రాష్ట్రంలో విజయం సాధించబోతున్నామా? మీకు తెలుసు ఈ రాష్ట్రంలో గెలవకపోతే, నేను గవర్నర్​నే నిందిస్తాను. నేను ఆయన్ను ఎలాగైనా తొలగిస్తాను. అందుకోసం ఏదో ఒక మార్గాన్ని కనుక్కుంటా"

- డొనాల్డ్​ ట్రంప్​, అమెరికా అధ్యక్షుడు

2016 అధ్యక్ష ఎన్నికల్లో ఫ్లోరిడాలో ట్రంప్​ విజయం సాధించారు. ఎన్నికల్లో కీలకంగా ఉండే ఈ రాష్ట్రంలో 49.02 శాతం ఓట్లు ట్రంప్​కు వచ్చాయి. డెమొక్రటిక్​ అభ్యర్థి హిల్లరి క్లింటన్​.. విజయానికి చేరువగా వచ్చారు. 47.82 శాతం ఓట్లు సాధించారు. ప్రస్తుతం ఫ్లోరిడాలో ముందస్తు అంచనాల ప్రకారం జో బైడెన్​ కన్నా ట్రంప్​ 1.4 శాతం మేర వెనకబడినట్లు తెలుస్తోంది. బైడెన్​కు 48.2 శాతం పాయింట్స్​ రాగా ట్రంప్​కు 46.8 శాతం పాయింట్లు వచ్చాయి.

ఇదీ చూడండి: బైడెన్​ గెలిస్తే అమెరికాను వదిలి వెళ్తానేమో: ట్రంప్
​