వెంటిలేటర్ల తయారీ కోసం ట్రంప్​ 'పవర్​ఫుల్​ చట్టం'

అమెరికాలో అధికంగా పెరిగిపోతున్న కరోనా కేసుల వల్ల వెంటిలేటర్ల కొరత ఏర్పడింది. ఈ నేపథ్యంలో వాటిని తయారు చేయాలని ప్రముఖ ఆటోమొబైల్ సంస్థ జనరల్​ మోటార్స్​ను ట్రంప్ ఆదేశించారు. ఇందుకోసం యుద్ధ సమయాల్లో అమలు చేసే రక్షణ ఉత్పత్తి చట్టాన్ని తీసుకొచ్చారు.

అమెరికాలో కరోనా కేసులు చైనాను మించిపోయాయి. ఇప్పటి వరకు మహమ్మారి బారిన పడ్డ వారి సంఖ్య లక్షకు చేరింది. ఫలితంగా వైరస్​ సోకిన వారికి చికిత్స అందించేందుకు వైద్య పరికరాల కొరత ఏర్పడింది. ఈ నేపథ్యంలోనే ప్రముఖ ఆటో మొబైల్​ దిగ్గజం జనరల్​ మోటార్స్​ను త్వరగా వెంటిలేటర్లు తయారు చేయమని అమెరికా అధ్యక్షుడు డొనాల్డ్ ట్రంప్ ఆదేశించారు. ఇందుకోసం​ యుద్ధ సమయాల్లో అమలు చేసే రక్షణ ఉత్పత్తి చట్టాన్ని తీసుకొచ్చారు. అయితే తయారీ ఖర్చుపై త్వరలో కంపెనీతో చర్చిస్తామని ట్రంప్​ పేర్కొన్నారు.

వెంటిలేటర్ల తయారీ ఒప్పందానికి ప్రాధాన్యం ఇవ్వడంలో రక్షణ ఉత్పత్తి చట్టం కింద వర్తించే అన్ని అధికారాలను ఉపయోగించాలని ఆరోగ్య శాఖ కార్యదర్శికి జారీ చేసిన మెమొరాండంలో పేర్కొన్నారు ట్రంప్​.

వెంటిలేటర్ల సరఫరా చేయగల సామర్థ్యం గురించి జీఎం కంపెనీతో చర్చలు కీలకమైనవి. ప్రస్తుతం వైరస్​కు వ్యతిరేకంగా మేము పోరాడాల్సిన అవసరం ఉంది. అయితే కంపెనీ సమయాన్ని వృథా చేస్తోంది. ఇప్పుడు తీసుకున్న నిర్ణయంతో అమెరికా ప్రజల ప్రాణాలు రక్షించే వెంటిలేటర్లను త్వరగా ఉత్పత్తి చేసేందుకు సాయపడుతుంది.

-డొనాల్డ్​ ట్రంప్​, అమెరికా అధ్యక్షడు

ఈ 10 రోజుల్లో అగ్రరాజ్యంలో వెంటిలేటర్ల అవసరం 8వేల నుంచి లక్షకు పెరిగింది. ముఖ్యంగా న్యూయార్క్​లో 40వేల వీటి అవసరం అధికంగా ఉంది. దేశంలో ఎక్కువగా ఈ రాష్ట్రంలోనే 45 వేలకుపైగా కేసులు నమోదయ్యాయి.

ఇప్పటి వరకు అమెరికాలో వైరస్​ కారణంగా 1,500 మంది మరణించారు. సుమారు 2,500 మంది పరిస్థితి విషమంగా ఉంది.

అన్ని దేశాలకు వెంటిలేటర్లను అందిస్తాం...

కరోనాతో పోరాడుతున్న మిత్రదేశాలకూ వెంటిలేటర్లు సరఫరా చేసేందుకు అమెరికా సిద్ధంగా ఉందని ట్రంప్​ తెలిపారు. ఇటీవలే బ్రిటన్​ ప్రధాని బోరిస్​ జాన్స్​కు కరోనా పాజిటివ్​ తేలింది. ఈ నేపథ్యంలోనే ట్రంప్​ జాన్సన్​తో మాట్లాడగా.. వెంటిలేటర్లు కావాలని ప్రధాని అడిగినట్లు అమెరికా అధ్యక్షుడు వెల్లడించారు. అమెరికా సుమారు లక్షకుపైగా వెంటిలేటర్లను ఉత్పత్తి చేస్తోందని, అవసరమైన ప్రతి దేశానికీ వీటిని అందిస్తామని ట్రంప్​ స్పష్టం చేశారు.