వచ్చే ఏడాది జరగనున్న అమెరికా అధ్యక్ష ఎన్నికల్లో గెలిచి మరోమారు శ్వేతసౌధ పీఠాన్ని అధిరోహించాలని డొనాల్డ్ ట్రంప్ ఆలోచిస్తున్నారు. ఇందుకోసం ఎడతెరిపి లేకుండా ప్రచారాలు చేస్తున్నారు. ఈ తరుణంలో వాషింగ్టన్లోని ఆ దేశ సైనిక ఆసుపత్రిలో ట్రంప్ హఠాత్తుగా వైద్య చికిత్సలు చేయించుకోవడం సర్వత్రా చర్చనీయాంశంగా మారింది. ట్రంప్ ఆరోగ్యానికి ఏమైంది? అన్న సందేహాలు అంతటా ఉద్భవించాయి. ఈ ప్రశ్నలన్నింటికీ ఫుల్స్టాప్ పెట్టారు శ్వేతసౌధ మీడియా కార్యదర్శి స్టీఫెన్ గ్రిషమ్.
సాధారణ వైద్య పరీక్షల్లో భాగంగానే అధ్యక్షుడు వాల్టర్ రీడ్ జాతీయ సైనిక వైద్య సెంటర్కు వచ్చారని తెలిపారు. డొనాల్డ్ ట్రంప్ ఎప్పటిలాగే.. ఆరోగ్యంగా, ఉత్సాహంగా ఉన్నారని ప్రకటించారు. 2020 ఎన్నికల ప్రచార బిజీ షెడ్యూల్లో ఒకవారం తీరిక దొరకడం వల్లే వైద్య పరీక్షలు చేయించుకున్నారని వెల్లడించారు.
" అధ్యక్షుడి ఆరోగ్యానికి ఏమీ కాలేదు. ఈ వారంలో వేలాది మంది అమెరికన్ల ముందు ఎన్నికల ప్రచారాల్లో పాల్గొన్న విధంగానే.. ఆరోగ్యంగా, ఉత్సాహంగా ఉన్నారు. ఆయన పట్ల ప్రత్యేక శ్రద్ధతో చికిత్స నిర్వహించిన అధికారులకు ట్రంప్ కృతజ్ఞతలు తెలిపారు. ఆసుపత్రి నుంచి వెళ్లే ముందు అఫ్గానిస్థాన్లో గాయపడ్డ అమెరికా ప్రత్యేక దళం సైనికుల కుటుంబాలతో ట్రంప్ ముచ్చటించారు. వాల్టర్ రీడ్ నేషనల్ మెడికల్ సెంటర్కు రావడం అధ్యక్షుడికిది తొమ్మిదో సారి."