రెండోసారి గెలుపుకోసం.. చట్టాలను ఉల్లంఘిస్తున్న ట్రంప్​!

అమెరికాలో మరోసారి అధికారం చేజిక్కించుకోవడమే లక్ష్యంగా ప్రస్తుత అధ్యక్షుడు డొనాల్డ్‌ ట్రంప్‌ అడుగులు వేస్తున్నారా..?. ఇందుకోసం అధికార యంత్రాగాన్ని స్వలాభానికి వాడుకుంటున్నారా..? అంటే అవుననే అంటున్నారు ప్రత్యర్థులు. అధికారిక నివాసం శ్వేతసౌధాన్ని రాజకీయ కార్యకలాపాలకు వినియోగించడమే కాకుండా ప్రభుత్వ అధికారులను ప్రచారంలో భాగస్వామ్యం చేస్తున్నారని ట్రంప్​పై విమర్శలు గుప్పిస్తున్నారు. గురువారం రాత్రి శ్వేతసౌధం ఆవరణలో రిపబ్లికన్​ నేషనల్​ కన్వెన్షన్​ ఏర్పాటు చేయడం.. ట్రంప్ అందులో ప్రసంగించడం ఆ ఆరోపణలకు మరింత బలం చేకూర్చినట్లు అయ్యింది.

అమెరికా అధ్యక్ష ఎన్నికలకు సమయం దగ్గరపడుతోంది. అయితే రిపబ్లికన్ల తరఫున అధ్యక్ష అభ్యర్థిగా నామినేట్​ అయిన ట్రంప్​.. గురువారం వైట్​హౌస్​లో జరిగిన రిపబ్లికన్​ నేషనల్​ కన్వెన్షన్​లో ట్రంప్​ ప్రసంగించడం తీవ్ర విమర్శలకు దారితీస్తోంది. వైట్​హౌస్​ పరిసరాలను రాజకీయ సమావేశాల కోసం వాడుకోవడం, ​హాజరైన అతిథులు కనీసం కరోనా నిబంధనలు పాటింకపోవండపై ఇప్పటికే ప్రత్యర్థులనుంచి విమర్శలు ఎదుర్కొంటున్న ట్రంప్​.. తాజాగా ప్రభుత్వ అధికారులను రాజకీయ ప్రచారంలో భాగస్వామ్యం చేయడంపైనా మండిపడుతున్నారు. ట్రంప్​ హ్యాచ్​ చట్టాన్ని అతిక్రమించారని ఆరోపిస్తున్నారు.

ట్రంప్​పై ప్రత్యర్థుల ఆరోపణల నేపథ్యంలో యూఎస్ చట్టాలపై పట్టున్న భారతీయ ప్రముఖ లాయర్ డాక్టర్​ సూరత్​ సింగ్​ 'ఈటీవీ భారత్'​తో మాట్లాడారు.

"ట్రంప్​ సాంకేతికంగా హ్యాచ్​ చట్టాన్ని ఉల్లంఘించలేదు. కానీ అతను అమెరికా ప్రభుత్వాన్ని నడిపించే అన్ని నిబంధనలను తుంగలోకి తొక్కారు" అని అభిప్రాయపడ్డారు సూరత్​ సింగ్. ఈ సుప్రీంకోర్టు లాయర్​ ఒబామాతో కలిసి హార్వర్డ్​లో చదువుకున్నారు. కరోనా మహమ్మారి సమయంలోనూ ట్రంప్ సమావేశంలో భౌతిక దూరం పాటించకపోవడాన్ని ఆమె తప్పుపట్టారు.​

హ్యాచ్​ చట్టం అంటే...?

1939 నాటి హ్యాచ్​ చట్టం.. హానికరమైన రాజకీయ కార్యకలాపాలను నివారిస్తుంది. ఇది యూఎస్​ ఫెడరల్​ చట్టాన్ని ప్రతిబింబిస్తుంది. ఫెడరల్ ప్రభుత్వ కార్యనిర్వాహక శాఖలోని సివిల్ సర్వీస్ ఉద్యోగులు.. కొన్ని రకాల రాజకీయ కార్యకలాపాలకు పాల్పడకుండా నిషేధించడం దీని ప్రధాన ఉద్దేశం. ఇందులో అధ్యక్షుడు, ఉపాధ్యక్షుడికి మినహాయింపు ఉంటుంది. ఇది ఆగస్టు 2, 1939న చట్టంగా మారింది. ఈ చట్టానికి న్యూ మెక్సికోకు చెందిన సెనేటర్ కార్ల్​హ్యాచ్​ పేరు మీద పెట్టారు. దీన్ని చివరిగా అధ్యక్షుడు ఒబామా హయాంలో 2012లో సవరించారు.

ఆగస్టు 27న వైట్​హౌస్ వేదికగా రిపబ్లికన్ల తరఫున తన నామినేషన్​ను అంగీకరిస్తూ.. రిపబ్లికన్​ నేషనల్​ కన్వెన్షల్​(ఆర్​ఎన్​సీ)లో అధికారికంగా ప్రకటించారు. అయితే ఇందులో ప్రభుత్వ అధికారులను భాగస్వామం చేయడం సాంకేతికంగా తప్పు కానప్పటీ.. నైతికంగా తప్పేనని విమర్శకులు అభిప్రాయపడుతున్నారు.

"హ్యాచ్ చట్టం అనేది అధికారం, అభ్యర్థుల మధ్య గోడగా ఉంటుంది. ఈ రోజు ఒక అభ్యర్థి ఆ గోడను కూల్చివేసి తన సొంత ప్రచారం కోసం అధికారాన్ని వినియోగించుకున్నారు"అని యూఎస్ ప్రభుత్వ ఎథిక్స్​ కార్యాలయం మాజీ అధిపతి వాల్టర్ షాబ్.. ట్రంప్​ను ఉద్దేశించి ట్వీట్ చేశారు. డొనాల్డ్​తో విబేధాల కారణంగా 2017లో తన పదవి నుంచి అర్ధాంతరంగా వైదొలిగారు షాబ్​.

అధికారిక పర్యటనల్లో రాజకీయ సమావేశాలా?

అమెరికా సెక్రటరీ మైక్​ పాంపియో అధికారిక పనుల మీద జెరూసంలేం వెళ్లినా.. అక్కడ నుంచే ఆయన కన్వెన్షన్​లో వర్చువల్​గా పాల్గొన్నారు. దీనిపై విమర్శలు చేశారు కౌన్సిల్​ ఆన్​ ఫారన్​ రిలేషన్స్​లో ప్రెసిడెంట్​ అయిన రిచర్డ్స్​ హ్యాస్. ఈ మేరకు ఓ ట్వీట్​ చేశారు. విదేశాంగ విధానాల్లో అమెరికా ప్రభుత్వం తీసుకున్న నిర్ణయాలను.. ట్రంప్​ తన స్వీయ లాభం కోసం రాజకీయ ప్రచారాల్లో వాడుకుంటున్నారని ఇప్పటికే ప్రత్యర్థి డెమొక్రాట్ల నుంచి విమర్శలు వచ్చాయి.

ట్రంప్ హాచ్ చట్టాన్ని ఉల్లంఘించకపోవచ్చు కానీ అమెరికా ప్రభుత్వాన్ని నడిపించే నిబంధనలను మీరినందుకు ఆయన దోషే అంటూ అభిప్రాయపడ్డారు ఇండో-అమెరికన్​, ప్రముఖ లాయర్ డాక్టర్​ సూరత్​ సింగ్.

"అమెరికా ప్రభుత్వాన్ని నడిపించే అన్ని చారిత్రక నిబంధనలను ఉల్లంఘిస్తున్న ఆయన (ట్రంప్) ట్వీట్ల ద్వారా దేశాన్ని నడపడానికి ప్రయత్నిస్తున్నారు. కరోనా వైరస్​కు సంబంధించి ముఖ్య ఆరోగ్య అధికారిని సూచనలనే ట్రంప్​ విస్మరించారు. ఎంతో మంది చనిపోతున్న సమయంలోనూ శాస్త్రీయ అభిప్రాయాలను కాదని తన వ్యక్తిగత నిర్ణయాలనే అమలు చేశారు. ఒబామా అందించిన అమెరికా నైతిక నాయకత్వం ట్రంప్ పరిపాలనలో బాగా క్షీణించింది"

-- డాక్టర్​ సూరత్​ సింగ్​, ఇండో-అమెరికన్​, ప్రముఖ లాయర్.

ఈ ఏడాది అమెరికా అధ్యక్ష ఎన్నికలు నవంబర్​ 3న జరగనున్నాయి. ప్రస్తుత అధ్యక్షుడు ట్రంప్​.. రిపబ్లికన్​ అభ్యర్థిగా మళ్లీ బరిలోకి దిగుతున్నారు. ప్రత్యర్థిగా డెమొక్రాట్​ అభ్యర్థి జో బైడెన్​ పోటీపడుతున్నారు.