2020 అమెరికా అధ్యక్ష ఎన్నికల కోసం భారీగా నిధులు సమీకరిస్తున్నారు ట్రంప్ మద్దతుదారులు. ఈ ఏడాది మూడో త్రైమాసికంలో 125 మిలియన్ అమెరికా డాలర్లను రిపబ్లికన్ నేషనల్ కమిటీ, డొనాల్డ్ ట్రంప్ ఎలక్షన్ క్యాంపెయిన్ కలిసి సమీకరించాయి. ఇది అధ్యక్ష ఎన్నికల నిధుల సమీకరణలో ఓ రికార్డు.
ఒబామా హయాంలో 2011 మూడో త్రైమాసికంలో కేవలం 70 అమెరికా డాలర్లను మాత్రమే సమీకరించారు.
2019లో 308 మిలియన్ అమెరికా డాలర్లను సమీకరించినట్లు ట్రంప్ మద్దతుదారులు వెల్లడించారు. 156 మిలియన్ డాలర్లు బ్యాంకులో నిల్వ ఉన్నట్లు తెలిపారు. ట్రంప్పై డెమొక్రాట్ల అభిశంసన తీర్మానానికి వ్యతిరేకంగా ఈ నిధుల సమీకరణ చేపట్టారు.
"అధ్యక్షుడు డొనాల్డ్ ట్రంప్ ఎన్నికల ప్రచారం ఎదురులేకుండా సాగుతోంది. రికార్డు వేగంతో భారీ స్థాయిలో నిధులు సమీకరిస్తున్నారు."
-బ్రాడ్ పార్స్కేల్, డొనాల్డ్ ట్రంప్ ఎలక్షన్ క్యాంపెయిన్ మేనేజర్
.
"ట్రంప్పై డెమొక్రాట్ల విమర్శనాస్త్రాలే కార్యకర్తలకు రికార్డు స్థాయిలో నిధులు సమీకరించడానికి ఉత్సాహాన్నిచ్చాయి. 2020 ఎన్నికలలో ట్రంప్ను అధ్యక్షుడిగా తిరిగి ఎన్నుకొని, డెమొక్రాట్లను జవాబుదారీగా చేయడమే లక్ష్యంగా మిలియన్ల కొద్దీ వెచ్చిస్తున్నాము."
-రొన్నా మెక్డేనియల్, రిపబ్లికన్ నేషనల్ కమిటీ అధ్యక్షులు
ట్రంప్నకు మద్దతుగా భారీ ప్రచారాల కోసం నిధుల సేకరణ ప్రారంభించారు. ట్రంప్ను అధ్యక్షుడిగా తిరిగి ఎన్నుకునేందుకు బిలియన్ అమెరికా డాలర్లను ఖర్చు చేయనున్నారు.
డెమొక్రాట్లు అధ్యక్షుడిపై గత వారం అభిశంసన తీర్మానాన్ని ప్రవేశపెట్టారు. అయితే డెమొక్రాట్ల చర్యలకు వ్యతిరేకంగా 8 మిలియన్ అమెరికా డాలర్లను ప్రకటనల నిమిత్తం ఖర్చు చేయనున్నట్లు ట్రంప్ క్యాంపెయిన్ ప్రకటించింది. అభిశంసన తీర్మానానికి డెమొక్రాట్ల మద్దతుకు వ్యతిరేకంగా రిపబ్లికన్ నేషనల్ కమిటీ కూడా 2 మిలియన్ అమెరికా డాలర్లను ఖర్చు చేయనున్నట్లు వెల్లడించింది.
