'పారిస్' నుంచి వైదొలుగుతూ ఐరాసకు అమెరికా లేఖ పారిస్ వాతావరణ ఒప్పందం నుంచి వైదొలగుతున్నట్లు అమెరికా అధికారికంగా తెలియజేసింది. ఈ మేరకు ఐక్యరాజ్య సమితికి లేఖ పంపినట్లు అమెరికా విదేశాంగ శాఖ ప్రకటించింది. అయితే.. అంతర్జాతీయ వాతావరణ చర్చల్లో వాస్తవిక, ఆచరణాత్మక పాత్రను పోషిస్తామని వెల్లడించింది.
నష్టం కలుగుతుందని..
'పారిస్ పర్యావరణ ఒప్పందం 2015'.. పారిశ్రామికీకరణతో వేడెక్కుతోన్న భూగోళాన్ని రక్షించేందుకు.. ఏర్పాటు చేసుకున్న ఒప్పందం. ఈ ఒడంబడికపై దాదాపు 200 దేశాలు సంతకాలు చేశాయి. ఈ ప్రపంచ ఒప్పందం కుదరడానికి అమెరికా మాజీ అధ్యక్షుడు బారక్ ఒబామా, భారత ప్రధాని నరేంద్ర మోదీ కీలక పాత్ర పోషించారు.
2016 నవంబర్ 4 నుంచి ఇది అమలులోకి వచ్చింది. అయితే డొనాల్డ్ ట్రంప్ అమెరికా అధ్యక్ష బాధ్యతలు చేపట్టాక... ఈ ఒప్పందం భారత్, చైనాలకు అనుకూలంగా ఉందని, అమెరికా ప్రయోజనాలకు తీవ్ర నష్టం కలుగిస్తోందని ఆరోపిస్తూ ఒప్పందం నుంచి వైదొలుగుతున్నట్లు ప్రకటించారు. ఒప్పందం ప్రకారం సంతకం చేసిన ఏ దేశమూ.. మూడేళ్ల వరకు వైదొలగడానికి ఆస్కారం లేదు. అయితే గడువు ముగియడం వల్ల ఇప్పుడు వైదొలగే ప్రక్రియ ప్రారంభించింది అగ్రరాజ్యం. ఐరాసకు లేఖ రాసింది.
ఫ్రాన్స్ విచారం...
పారిస్ వాతావరణ ఒప్పందం నుంచి అమెరికా వైదొలుగుతుందని ముందే ఊహించినట్లు తెలిపిన ఫ్రాన్స్... ఈ నిర్ణయం పట్ల విచారం వ్యక్తం చేసింది.
చైనా పర్యటనలో ఉన్న ఫ్రాన్స్ అధ్యక్షుడు మేక్రాన్ "అమెరికా వైదొలుగుతున్నందుకు మేం చింతిస్తున్నాము. అగ్రరాజ్య నిర్ణయం వాతావరణం, జీవవైవిధ్యాలపై ఫ్రాంకో-చైనీస్ భాగస్వామ్యాన్ని మరింత తప్పనిసరి చేస్తోంది." అని తెలిపారు.
అధ్యక్షుడు మారితే మళ్లీ చేరొచ్చు...
పారిస్ ఒప్పందం నుంచి అమెరికా వైదొలిగే.. ఈ ప్రక్రియ ముగియడానికి ఏడాది సమయం పట్టొచ్చు. ఈ లోపు 2020 అమెరికా అధ్యక్ష ఎన్నికలు అయిపోతాయి. అయితే ఎన్నికల్లో ట్రంప్ కాకుండా మరెవరైనా అధ్యక్షుడిగా ఎన్నికైతే.. వారి నిర్ణయం మేరకు 30 రోజుల్లో తిరిగి ఒప్పందంలో చేరవచ్చు. ఒప్పందం నుంచి వైదొలగాలనే ట్రంప్ నిర్ణయంపై ప్రతిపక్ష డెమొక్రాట్లు, ప్రజాసంఘాలు ఆగ్రహంగా ఉన్నాయి.
ఇదీ చూడండి:'పారిస్' నుంచి వైదొలిగేందుకు అమెరికా ప్రక్రియ షురూ!
