అమెరికన్ అంతరిక్ష పరిశోధనా సంస్థ-నాసాకు చెందిన జెట్ ప్రొపల్షన్ ల్యాబోరేటరీస్(జేపీఎల్) అభివృద్ధి చేసిన చౌక వెంటిలేటర్ల ఉత్పత్తికి మూడు భారతీయ సంస్థలు ఎంపికయ్యాయి. ప్రపంచవ్యాప్తంగా 21 కంపెనీలకు లైసెన్స్ లభించగా.. అందులో భారత్ నుంచి ఆల్ఫా డిజైన్ టెక్నాలజీస్, భారత్ ఫోర్జ్, మేధా సెర్వో డ్రైవ్స్కు ఈ అవకాశం దక్కింది.
'వెంటిలేటర్ల తయారీ కోసం నాసా ఎంపిక చేసిన మూడు భారతీయ కంపెనీలకు అభినందనలు. ప్రపంచవ్యాప్తంగా 21 కంపెనీలలో 3 భారత కంపెనీలు ఉండటం.. కరోనాపై పోరాటంలో భారత ప్రాముఖ్యాన్ని తెలియజేస్తోంది.'
- భారత విదేశాంగ శాఖ
ఎందుకింత ప్రత్యేకత..?
కరోనా సంక్షోభంతో ఒక్కసారిగా ప్రపంచవ్యాప్తంగా వెంటిలేటర్ల కొరత ఏర్పడింది. అందుకే వేర్వేరు సంస్థలు వాటి తయారీపై దృష్టిపెట్టాయి. దక్షిణ కాలిఫోర్నియా కేంద్రంగా పనిచేసే జేపీఎల్ వైటల్ పేరిట కొత్త రకం వెంటిలేటర్లను డిజైన్ చేసింది. సంప్రదాయ వెంటిలేటర్లలోని విడి భాగాల్లో ఏడో వంతుతో రూపొందించడం ఈ వైటల్ వెంటిలేటర్ల ప్రత్యేకత. అధునాతన ఫీచర్లతో రూపొందిన వీటిని తాత్కాలిక ఆస్పత్రుల్లోనూ సులభరీతిలో వినియోగించుకునే వీలు ఉంటుంది.
'ఎఫ్డీఏ' ఓకే..
వైటల్ వెంటిలేటర్ను ఏప్రిల్ 3న మౌంట్ సినాయ్లో 'హ్యూమన్ సిమ్యులేషన్ ల్యాబ్' పరీక్షించింది. కరోనా సంక్షోభాన్ని ఎదుర్కొనే పరిష్కార మార్గాల్లో వైటల్ పరిజ్ఞానం కీలకం కానుందని అక్కడి వైద్య బృందం పేర్కొంది. వైటల్కు.. అమెరికన్ ఫుడ్ అండ్ డ్రగ్ అడ్మినిస్ట్రేషన్(ఎఫ్డీఏ) సంస్థ అనుమతి కూడా లభించింది.
ఇదీ చదవండి:శీతాకాలం కరోనా కాలమే! మరింత విజృంభించే అవకాశం
