అతిపెద్ద శ్మశానంలో ఎక్కడ చూసినా కరోనా మృతులే!

ప్రపంచవ్యాప్తంగా లక్షలాది మంది కరోనాకు బలైపోతున్నారు. బ్రెజిల్​లోనూ ఈ ప్రభావం తీవ్రంగా కనిపిస్తోంది. ఇప్పటికే దేశంలో వేలమంది కొవిడ్​-19తో మరణించగా.. లాటిన్​ అమెరికాలోనే అతిపెద్ద శ్మశానవాటిక 'విలా ఫాల్మోసా'మృతదేహాలతో నిండిపోయింది.

బ్రెజిల్​ సావో పాలో రాష్ట్రంలో ఉండే 'విలా ఫార్మోసా' శ్మశానవాటిక.. కరోనా మృతులతో దిబ్బగా మారింది. లాటిన్​ అమెరికాలోనే అతిపెద్దదైన ఈ శ్మశానంలో.. కొవిడ్​తో చనిపోయిన వారి మృతదేహాలను ఖననం చేస్తున్నారు. రోజూ వందల్లో శవాలు రావడం వల్ల అంత్యక్రియలకు ఇబ్బందులు ఏర్పడుతున్నాయి.

కరోనాతో మరణించిన తన తల్లికి అంత్యక్రియలు నిర్వహించడానికి వచ్చిన డానియేలా డాస్​ శాంటోస్​ ఆవేదన వ్యక్తం చేశారు. మహమ్మారి తన ప్రియమైన వ్యక్తి ప్రాణాలు తీసిందని.. ఇంకా తన తండ్రినీ ఆస్పత్రిలో ఉండేలా చేసిందని విలపించారు. బుధవారం ఇదే ప్రాంతంలో తన మాతృమూర్తిని ఖననం చేస్తూ.. డానియేలా కన్నీటిపర్యంతమయ్యారు. బ్యాంక్​ ఉద్యోగిగా పనిచేసిన తన తల్లి.. ఆనారోగ్యంతో 20 రోజులకుపైగా ఆసుపత్రిలోనే గడిపారని చెప్పారు. చనిపోవడానికి ఒకరోజు ముందే పరీక్షల్లో ఆమెకు వైరస్ నిర్ధరణ అయ్యిందన్నారు.

కన్నీటిపర్యంతమవుతున్న కుటుంబసభ్యులు

" ఈ వైరస్​ చాలా నిశ్శబ్దంగా వస్తోంది. ఇక్కడ చూడండి నేను నా తల్లిని ఖననం చేస్తున్నా. నాకు ఇప్పుడు 30 సంవత్సరాలు. మా అమ్మ 57 ఏళ్ల వయసులోనే చనిపోయింది. నిన్నటి నుంచి మా నాన్న కూడా ఆసుపత్రిలో చికిత్స పొందుతున్నారు. ఏ సమయంలోనైనా ఆయననూ కోల్పోవచ్చు.

-- డానియేలా డాస్​ శాంటోస్​

కుప్పలుతెప్పలుగా మృతదేహాలు శ్మశానానికి రావడం వల్ల.. తన ప్రియమైన వారిని ఆఖరిసారి కళ్లారా చూసుకునే భాగ్యం కూడా లేకుండా పోతోందని డానియేలా ఆవేదన చెందారు.

మృతదేహాలను శ్మశానానికి తరలింపు

బ్రెజిల్​లో ఇప్పటివరకు 18,894 మంది మహమ్మారికి బలయ్యారు. 2 లక్షల 93,357 మందికి కరోనా సోకింది. లాటిన్​ అమెరికా దేశాల్లో అత్యధిక కరోనా మరణాలు సంభవించింది ఇక్కడే. ఇక సావో పాలో రాష్ట్రంలోనే ఇప్పటివరకు 5,300 మంది కరోనాతో మృతి చెందారు. సమారు 70 వేలకుపైగా కేసులు నమోదయ్యాయి.