ముల్లంగి పండగ.. చూడండి కనులవిందుగా..!

మెక్సికోలోని ఓక్సాకా నగరంలో దశాబ్దాలుగా నిర్వహిస్తున్న 'నోచే డి రబనోస్' కార్యక్రమానికి కళాకారులు భారీగా తరలివచ్చారు. ముల్లంగితో వివిధ రకాల ఆకృతులను తీర్చిదిద్ది ప్రదర్శించారు. అక్కడి ప్రజలు గత 122 ఏళ్ల నుంచి ఈ కార్యక్రమాన్ని జరుపుకుంటుండటం విశేషం.

మెక్సికో క్రిస్మస్ వేడుకల్లో ఆసక్తికరమైన కార్యక్రమాలు జరుగుతున్నాయి. ఈ నేపథ్యంలో ఓక్సాకా నగరంలో దశాబ్దాలుగా నిర్వహించే 'నోచే డి రబనోస్' కార్యక్రమానికి ప్రజలు భారీగా తరలివచ్చారు. నోచే డి రబనోస్ అంటే నైట్ ఆఫ్ రాడిష్ అని అర్థం. ఇందులో ముల్లంగితో వివిధ రకాల ఆకారాలను వినూత్న రీతిలో తీర్చిదిద్దుతారు కళాకారులు.

నైపుణ్యం ఉన్న కళాకారులందరూ ఇందులో పాల్గొని వారి కళాఖండాలను ప్రదర్శించారు. ముల్లంగితో పలు ప్రసిద్ధి పొందిన పాత్రలు సహా మతపరమైన సన్నివేశాలు ప్రతిబింబించేలా అద్భుతంగా తీర్చిదిద్దారు. ఓక్సాకా నగరంలోని కళాకారులు, స్థానికులకు మధ్య ఐకమత్యాన్ని పెంపొందించడానికి ఈ కార్యక్రమం ఉపయోగపడుతుందని వారి అభిప్రాయం.

వేడుకలో ఉపయోగించే ముల్లంగిని ఈ కార్యక్రమం కోసమే ప్రత్యేకంగా పండిస్తారు. ఈ పండుగను 122 ఏళ్ల నుంచి నిర్వహిస్తున్నారు. వినియోగదారులను ఆకర్షించడానికి దుకాణాదారులు తమ షాపులను కూరగాయలతో అలంకరించడం ప్రారంభమైనప్పటి నుంచి ఈ వేడుకలు మొదలైనట్లు స్థానికులు చెబుతున్నారు.

ఇదీ చదవండి: ప్రపంచంలో అతిపెద్ద త్రీడీ శాంటాక్లాజ్​ సైకత శిల్పం