'విమానాలు కనపడకుండా పోతాయి జాగ్రత్త..!'

మధ్యప్రాచ్యంలో ఉద్రిక్త వాతావరణం రోజురోజుకూ పెరిగిపోతోంది. అమెరికా- ఇరాన్​ దేశాల మధ్య యుద్ధం జరిగే అవకాశముందనే నిపుణులు హెచ్చరికలతో గల్ఫ్​ ప్రాంత ప్రజలు బిక్కుబిక్కుమంటూ జీవిస్తున్నారు. వీటికి తోడు తాజాగా ఆ ప్రాంతంలో ప్రయాణించే విమానాలు కనపడకుండా పోయే ప్రమాదం ఉందని అమెరికా దౌత్యవేత్తలు హెచ్చరించారు. ఈ హెచ్చరికలతో పరిస్థితి మరింత ఉద్రిక్తమైంది.

విమానాలకు హెచ్చరికలు, కంపెనీల సిబ్బంది తరలింపు, సర్వత్రా ఆందోళన... అమెరికా- ఇరాన్​ దేశాల మధ్య యుద్ధ మేఘాలు అలుముకున్న నేపథ్యంలో మధ్యప్రాచ్యంలో నెలకొన్న తాజా పరిస్థితులు ఇవి. ఇరు దేశాల మధ్య రోజురోజుకూ సంబంధాలు దెబ్బతింటున్నాయి. యుద్ధం జరిగే అవకాశాలు ఉన్నాయన్న నిపుణుల హెచ్చరికలతో పర్షియన్​ గల్ఫ్​ ప్రాంత ప్రజలు బిక్కుబిక్కుమని జీవనం సాగిస్తున్నారు.

విమాన సంస్థలు... జాగ్రత్త

పర్షియన్​ గల్ఫ్​ ప్రాంతంలో ప్రయాణించే విమానాలు కనపడకుండాపోయే అవకాశముందని హెచ్చరించారు అమెరికా దౌత్యవేత్తలు. ఈ హెచ్చరికలు ఇరు దేశాల మధ్య ఉన్న ఉద్రిక్తతను మరింత పెంచాయి. అంతర్జాతీయ విమానాలకు గల్ఫ్​ ప్రాంతంలో ప్రమాదం పొంచి ఉందన్న అమెరికా ఫెడరల్​ విమానయాన యంత్రాంగం వ్యాఖ్యలకు అగ్రరాజ్య దౌత్యవేత్తల హెచ్చరికలు మరింత బలోపేతం చేకూరుస్తున్నాయి.

'తిరిగి వచ్చేయండి'

యుద్ధ మేఘాలు అలుమకున్న దృష్ట్యా ఇరాన్​, ఇరాక్​ దేశాల్లోని ప్రముఖ కంపెనీలు తమ సిబ్బందిని ఇతర ప్రాంతాలకు తరలిస్తున్నాయి. ఇరాన్​, ఇరాక్​లో నివసిస్తున్న బెహ్రయిన్​వాసులను ఆ దేశ ప్రభుత్వ వెనక్కి పిలిచింది.

ఇరాన్​తో నెలకొన్న ఉద్రిక్తతలపై ఇప్పటికే పలుమార్లు స్పందించారు అమెరికా అధ్యక్షుడు డొనాల్డ్​ ట్రంప్​. ఇరాన్​తో యుద్ధం చేసే యోచన లేదని స్పష్టం చేశారు. యుద్ధం జరిగినా... అగ్రరాజ్యాన్ని ఓడించే సామర్థ్యం తమకుందని ప్రకటించింది ఇరాన్​.

ఇదీ చూడండి: 14 ఏళ్ల తర్వాత స్వగ్రామాలకు గిరిపుత్రులు