ఉగ్ర జాబితా నుంచి ఆ దేశాన్ని తొలగిస్తాం: ట్రంప్

ఉత్తర ఆఫ్రికా దేశం సూడాన్​ను 'ఉగ్రవాద ప్రోత్సాహక దేశాల జాబితా' నుంచి తొలగిస్తామని అమెరికా అధ్యక్షుడు డొనాల్డ్ ట్రంప్ తెలిపారు. అమెరికాలోని ఉగ్రవాద బాధితులకు పరిహారం అందిస్తామని సూడాన్​ ప్రకటించిన నేపథ్యంలో ఈ మేరకు నిర్ణయం తీసుకున్నట్లు తెలిపారు. పరిహారం అందిన వెంటనే అమలు చేస్తామని స్పష్టం చేశారు.

'ఉగ్రవాద ప్రోత్సాహ దేశాల జాబితా' నుంచి ఉత్తర ఆఫ్రికా దేశం సూడాన్​ను త్వరలో తొలగిస్తామని అమెరికా అధ్యక్షుడు డొనాల్డ్ ట్రంప్ ప్రకటించారు. అమెరికాలోని ఉగ్రవాద బాధితులకు 33.5 కోట్ల డాలర్లను చెల్లించేందుకు సూడాన్​ అంగీకరించిన తర్వాత ట్రంప్ ఈ నిర్ణయాన్ని ప్రకటించారు.

ట్రంప్ ట్వీట్

"గొప్ప వార్త! అమెరికాకు చెందిన ఉగ్రవాద బాధితులకు 33.5 కోట్ల డాలర్లను చెల్లించడానికి సూడాన్​లోని కొత్త ప్రభుత్వం అంగీకరించింది. ఈ డబ్బు అందిన వెంటనే ఉగ్రవాద ప్రోత్సాహక దేశాల జాబితా నుంచి సూడన్​ను తొలగిస్తాం. ఆలస్యమైనా.. సూడాన్​ తీసుకున్న గొప్ప నిర్ణయంతో అమెరికా ప్రజలకు న్యాయం లభించింది."

- డొనాల్డ్ ట్రంప్, అమెరికా అధ్యక్షుడు

ఈ నిర్ణయం అమలైతే సూడాన్​కు అంతర్జాతీయంగా రుణాలు, సాయం అందుతాయి. ఫలితంగా చిక్కుల్లో ఉన్న ఆ దేశ ఆర్థిక వ్యవస్థ, ప్రజాస్వామ్యాన్ని సూడాన్​ కాపాడుకోగలదని విశ్లేషకులు అభిప్రాయపడుతున్నారు. ఇజ్రాయెల్​తో సూడాన్​ ప్రభుత్వం సంబంధాలు కొనసాగించడానికి ఈ నిర్ణయం కీలకం కానుంది.

ఇదీ చూడండి:మరో అరబ్​ దేశంతో ఇజ్రాయెల్​ 'దోస్తీ'