Vaccination Impact on Women's Periods : కరోనాను ఎదుర్కొనే వ్యాక్సిన్ పంపిణీ ప్రపంచవ్యాప్తంగా ముమ్మరంగా కొనసాగుతోంది. కరోనాను నిరోధించడంలో ఈ వ్యాక్సిన్‌లు సమర్థంగా పనిచేస్తున్నట్లు తేలినప్పటికీ వీటివల్ల ఏమైనా దుష్పరిణామాలు ఎదురవుతాయా అనే ఆందోళన, అనుమానాలు ఇప్పటికీ కొందరిలో వ్యక్తమవుతూనే ఉన్నాయి. ముఖ్యంగా మహిళల పీరియడ్స్పై (రుతుక్రమం) కరోనా వ్యాక్సిన్‌లు ఏవిధమైన ప్రభావం చూపుతాయనే ప్రశ్నలూ కొందరి మదిలో తలెత్తుతున్నాయి. ఈ నేపథ్యంలో తాజా అంశంపై తొలిసారి ఓ అధ్యయనం జరిగింది. వ్యాక్సిన్ తీసుకున్న మహిళల్లో కేవలం స్వల్ప, తాత్కాలిక మార్పులు మాత్రమే కలుగుతాయని వెల్లడైంది. అవి కూడా కొన్ని రోజుల్లోనూ సాధారణ స్థితికి వస్తున్నట్లు తేలింది.
ఒకరోజు మాత్రమే ఆలస్యం..
రుతుక్రమంపై వ్యాక్సిన్ల ప్రభావాన్ని అంచనా వేసేందుకు అమెరికాలోని 4వేల మంది మహిళలపై అధ్యయనం జరిపారు. ఇందుకోసం అమెరికా ఎఫ్‌డీఏ అనుమతి పొందిన బర్త్‌ కంట్రోల్‌ యాప్‌ సమాచారాన్ని పరిశోధకులు విశ్లేషించారు. వ్యాక్సిన్ తీసుకున్న తర్వాత దాదాపు ఆరు నెలసరి సమయాల్లో వీరి ఆరోగ్య పరిస్థితిని పరీక్షించారు. తద్వారా వ్యాక్సిన్ తీసుకున్న తర్వాత మరుసటి నెలసరి ఒకరోజు ఆలస్యంగా వచ్చినట్లు గుర్తించారు. అయితే, రుతుస్రావం విషయంలో మాత్రం ఎటువంటి తేడా లేదని గుర్తించారు. సాధారణంగా ఎన్ని రోజులు వస్తుందో.. వ్యాక్సిన్ తీసుకున్న తర్వాత కూడా అదే మాదిరిగా ఉందని కనుగొన్నారు. కేవలం కొందరి మహిళల్లో మాత్రమే పీరియడ్స్ క్రమంలో మార్పులు గమనించామని పరిశోధకులు వెల్లడించారు. ఇటువంటి సమస్యలు సాధారణమేనని.. ఒత్తిడి, ఆహారం, వ్యాయామం వంటి ఇటువంటి తాత్కాలిక మార్పులకు దారితీస్తాయని స్పష్టం చేశారు.