అమెరికాలో మంచు తుపాను బీభత్సం

అమెరికాలోని పలు రాష్ట్రాల్లో మంచు తుపాను బీభత్సం సృష్టిస్తోంది. అరిజోనాలో రహదారులపై అడుగుల మేర పేరుకుపోయిన మంచు.. వాహన రాకపోకలకు తీవ్ర అంతరాయం కలిగిస్తోంది. శీతల గాలులతో ప్రజలు తీవ్ర ఇబ్బందులకు గురవుతున్నారు. ఈ నేపథ్యంలో ప్రజలు అప్రమత్తంగా ఉండాలని అధికారులు సూచించారు.

అమెరికాలోని అనేక ప్రాంతాలను మంచు తుపాను అతలాకుతలం చేస్తోంది. దేశంలోనే అత్యధిక ఉష్ణోగ్రతలుండే అరిజోనా రాజధాని ఫీనిక్స్ పట్టణాన్ని హిమపాతం అనూహ్యంగా ముంచెత్తింది. మంచుకు ఉరుములు తోడవటం వల్ల పరిస్థితులు మరింత క్లిష్టంగా మారాయి.

ముఖ్యంగా అరిజోనా దక్షిణ ప్రాంతంలో భారీ హిమపాతం కురుస్తోంది. ఈ ప్రాంతంలో వర్షాలు కురవడమే అరుదు.. అలాంటిది ఇప్పుడు మంచు కప్పేయడం గమనార్హం. వీటితో పాటు బలమైన గాలులు తోడవ్వడం వల్ల చెట్లు నేలకొరిగాయి.

కాలిఫోర్నియాలోనూ మంచు తుపాను బీభత్సం సృష్టిస్తోంది. పర్వతాలన్నింటినీ మంచు దుప్పటి కప్పేసింది. ఈ రాష్ట్రంలో అంతర్జాతీయ రహదారిపై పెట్రోలింగ్​ను తాత్కాలికంగా నిలిపేశారు. వర్షం, మంచు కురవవచ్చని తుపాను హెచ్చరికలు జారీ అయ్యాయి. శాన్​ఫ్రాన్​న్సిస్కో తీర ప్రాంతాల నుంచి దుమ్ము తుపానులు రావచ్చనే హెచ్చరికలు సైతం ఆందోళన కలిగిస్తున్నాయి.

లాస్ వెగాస్‌లోనూ వర్షం, మంచు కురుస్తాయని, ప్రజలు అప్రమత్తంగా ఉండాలని అధికారులు ఆదేశించారు. నెబ్రస్కా, పశ్చిమ ఐయోవాలోనూ భారీగా మంచు కురిసే అవకాశం ఉందని అధికారులు తెలిపారు.

రోడ్లపై పేరుకుపోయిన మంచు

అరుదైన ప్రాంతాల్లో మంచు..

మరోవైపు రోడ్లపై కురిసిన మంచును తొలగించేందుకు వందల మంది తీవ్రంగా శ్రమిస్తున్నప్పటికీ రోడ్డు ప్రమాదాలు జరుగుతూనే ఉన్నాయి.

ఇదీ చదవండి:ఒళ్లు జలదరించే విన్యాసాలతో 'డౌన్​ హిల్'​ రేస్​