ప్రపంచవ్యాప్తంగా వేలాదిమందిని పొట్టనబెట్టుకున్న కరోనా వైరస్.. అమెరికాలో ఓ ఆరు వారాల పసికందును మింగేసింది. కనెక్టికట్లో ఈ విషాద ఘటన జరిగినట్లు ఆ రాష్ట్ర గవర్నర్ నెడ్ లామోంట్ స్పష్టం చేశారు. 32 రోజుల వయసున్న చిన్నారినీ కరోనా వదల్లేదని.. ఈ మహమ్మారికి ఎవరూ అతీతులు కాదనేందుకు ఇదే నిదర్శనమని హెచ్చరించారు లామోంట్.
" కనెక్టికట్లో కరోనాతో మృతి చెందిన అతి పిన్న వయస్కురాలు బహుశా ఈ పాపే కావొచ్చు. చిన్నారికి కనీసం ఏడు వారాల వయసు కూడా లేదు. ఈ మహమ్మారితో ఎవరి ప్రాణాలూ భద్రం కాదని ఈ పసికందు మరణం గుర్తుచేస్తోంది."
- నెడ్ లామోంట్, కనెక్టికట్ గవర్నర్
హార్ట్ఫోర్డ్కు చెందిన ఈ చిన్నారి ఉలుకుపలుకూ లేకుండా ఉన్నందున గతవారమే ఆసుపత్రికి తీసుకొచ్చారని.. అయితే పసికందుకు కరోనా పాజిటివ్గా వచ్చినట్లు పోస్టుమార్టంలో తేలిందని గవర్నర్ ట్వీట్ చేశారు. ఈ వైరస్కు జాలి, దయ లాంటివి లేవని, ఇంట్లో ఉండాల్సిన ప్రాధాన్యాన్ని ఈ ఘటన గుర్తుచేస్తున్నట్లు తెలిపారు లామోంట్.
'సమగ్ర యుద్ధం కొనసాగుతుంది'
భయంకరమైన కరోనా వైరస్పై విజయం సాధించేందుకు సమగ్ర యుద్ధాన్ని కొనసాగిస్తామన్నారు అమెరికా అధ్యక్షుడు డొనాల్డ్ ట్రంప్. ఇప్పటికే ఈ మహమ్మారి కారణంగా అమెరికాలో 5,100 మందికి పైగా ప్రాణాలు కోల్పోయారు. దేశవ్యాప్తంగా మొత్తం 2.15 లక్షల మందికిపైగా అమెరికన్లు వైరస్ బారిన పడ్డారు.
