కరోనా పరీక్షకు నమూనాను ఇచ్చిన తర్వాత ఫలితం రావటానికి రెండు, మూడు రోజులు పడుతోంది. వైద్య సిబ్బంది కొరతే దీనికి కారణం. అయితే ఎవరి సాయం లేకుండా స్వతహాగా కరోనా పరీక్ష చేసుకునే పోర్టబుల్ పరికరాన్ని అమెరికా శాస్త్రవేత్తలు అభివృద్ధి చేశారు. పరికరాన్ని సెల్ఫోన్కు అనుసంధానం చేసి 30 నిమిషాల్లో ఫలితాన్ని తెలుసుకోవచ్చు. ఈ పరిశోధన బృందంలో భారత సంతతికి చెందిన వ్యక్తి ఉండటం విశేషం. దీనికి సంబంధించి పూర్తి నివేదికను పీఎన్ఏఎస్ మ్యాగజైన్లో ప్రచురించారు.
సాధారణంగా వైద్యసిబ్బంది స్వాబ్ టెస్ట్ చేసి దానిని ప్రత్యేక రవాణా మార్గం ద్వారా ల్యాబ్కు పంపిస్తారు. అక్కడి నిపుణులు నమూనాను పరీక్షించి వైరస్ నిర్ధరణ చేస్తారు. ఈ ప్రక్రియకు చాలా సమయం పడుతున్నందున కొత్త పరికరాన్ని రూపొందించినట్లు తెలిపారు.
ఆర్టీ పీసీఆర్ టెస్ట్ను పరీక్షించటానికి ప్రత్యేక పరికరాలు, నిపుణల బృందం అవసరమవుతారని, దీనికి అలాంటి అవసరం ఉండదని చెప్పారు శాస్త్రవేత్త బ్రెయిన్ కన్నింగ్హమ్. పీసీఆర్ టెస్టుతో పోల్చినప్పుడు రెండు ఒకే విధమైన ఫలితాన్ని చూపించినట్లు వెల్లడించారు. పీసీఆర్ కంటే తమ పరికరమే బాగా పని చేస్తుందని వివరించారు. ముఖ్యంగా నమూనాను వేడి చేస్తుందని తద్వారా వైరస్ విచ్ఛిన్నమై కరోనా జన్యు క్రమాన్ని గుర్తించగలుగుతున్నట్లు తెలిపారు.
పరికరం పనితీరు ఇలా..
శాస్త్రవేత్తలు తయారు చేసిన నమూనాలో 3డీ ప్రింటెండ్ క్యాట్రిడ్జ్ పరికరం ఉంటుంది. హీటింగ్ ఛాంబర్ ఉండే చిన్న పరికరంలో ఈ క్యాట్రిడ్జ్ను అమర్చుతారు. దీనిలో రెండు ఇంజెక్షన్స్ ఉండేలా స్లాట్స్ ఉంటాయి. ఒక దానిలో వైరస్ నమూనాను, మరొక దానిలో రసాయనాన్ని ఉంచుతారు. రెండింటిని ఒక్కసారి ఇంజెక్షన్ చేసిన తర్వాత.. హీటింగ్ ఛాంబర్ ద్వారా క్యాట్రిడ్జ్ను 65 డిగ్రీల సెంట్రిగ్రేడ్ వద్ద వేడి చేస్తారు. తర్వాత అందులోని నమూనా చర్య జరిపి 30 నిమిషాల్లో ఫలితాన్ని వెల్లడిస్తుంది. పాజిటివ్ అయితే ఫ్లోరోసెంట్ లైట్ వెలుగుతుంది.
