కరోనా సోకిన రోగుల్లో యాంటీబాడీలు కనీసం మూడు నెలల వరకు ఉంటాయని శాస్త్రవేత్తలు గుర్తించారు. అమెరికాలోని హార్వర్డ్ మెడికల్ స్కూల్కు చెందిన శాస్త్రవేత్తలు సహా పలువురు పరిశోధకులు ఈ మేరకు జర్నల్ సైన్స్లో వ్యాసం రాశారు. 343 మంది కరోనా రోగుల్లోని రక్తంలో ఉన్న యాంటీబాడీల కదలికలను వైరస్ లక్షణాలు తేలిన తర్వాత 122 రోజుల పాటు పరిశీలించి పరిశోధకులు ఈ విషయాన్ని తేల్చారు. వైరస్ నిర్ధరణలో.. ప్రత్యామ్నాయ పరీక్షా విధానానికి తాజా పరిశోధన దోహదం చేయనుంది.
యాంటీబాడీ పరీక్ష కోసం లాలాజలాన్ని ప్రత్యామ్నాయ బయో ఫ్లూయిడ్గా వినియోగించవచ్చని పరిశోధకులు తెలిపారు. యాంటీబాడీలను ఐజీజీ, ఐజీఏ, ఐజీఎంలుగా వర్గీకరించిన పరిశోధకులు వీటిలో ఐజీజీ రకం యాంటీబాడీ(95 శాతం) రక్తం, లాలాజలంలో ఎక్కువకాలం ఉంటుందని గుర్తించారు.
రీజెనరాన్ గురించి అప్పుడే చెప్పలేం..
అమెరికా అధ్యక్షుడు డొనాల్డ్ ట్రంప్కు చికిత్సలో వినియోగించిన రీజెనరాన్ యాంటీబాడీ డ్రగ్ వంటి వాటితో కరోనా నుంచి కోలుకుంటారని కచ్చితంగా చెప్పలేమని అంటున్నారు వైద్య నిపుణులు. కానీ.. కొవిడ్ లక్షణాలు తగ్గడంలో ఆశాజనక ఫలితాలిస్తున్నట్లు వెల్లడించారు. ఈ ఔషధాలు ఇంకా ప్రయోగదశలోనే ఉన్నాయి. డ్రగ్ సురక్షితమేనా, ప్రభావవంతంగా పనిచేస్తుందా అనేది స్పష్టంగా తెలియదు.
తనకు అందించిన ఔషధాల్లో రీజెనరాన్ యాంటీబాడీ డ్రగ్ బాగా పనిచేసిందని ట్రంప్ అన్నారు. దాని వల్లే కోలుకున్నానని వ్యాఖ్యానించారు. స్వర్గం నుంచి వచ్చిన బహుమతిగా ఆయన దాన్ని అభివర్ణించడం విశేషం.
ఇదీ చూడండి:కరోనాను జయించి జనంలోకి వస్తోన్న ట్రంప్!
ఈ డ్రగ్ వాడేందుకు అనుమతి ఉన్న అతికొద్ది మందిలో ట్రంప్ ఒకరు. కరోనా చికిత్సలో దీనిని అందరికీ అందుబాటులో ఉంచాలంటే.. అమెరికాలోని ఆహార, ఔషధ నియంత్రణ సంస్థ(ఎఫ్డీఏ) అంగీకారం తప్పనిసరి.
