ఎలక్టోరల్ కాలేజీ ఎన్నికలో జో బైడెన్ విజయం సాధించడం రాజ్యాంగ ప్రక్రియలో ఓ ముందడుగు మాత్రమేనని శ్వేతసౌధ ప్రెస్ సెక్రెటరీ కైలీ మెక్ఎనానీ పేర్కొన్నారు. ఎన్నికల ఫలితాలపై అధ్యక్షుడు డొనాల్డ్ ట్రంప్ న్యాయ పోరాటం ఇంకా కొనసాగుతోందని చెప్పారు. బైడెన్ గెలుపును అంగీకరించి శ్వేతసౌధంలోకి ఆహ్వానిస్తారా అని విలేకరులు అడిగిన ప్రశ్నకు ఈ విధంగా సమాధానం చెప్పారు.
"ఎన్నికలకు సంబంధించిన న్యాయపరమైన చిక్కులపై ట్రంప్ ఇప్పటికీ పోరాడుతున్నారు. నిన్న జరిగింది రాజ్యాంగపరమైన ప్రక్రియలో ఓ భాగం మాత్రమే. కాబట్టి ఈ విషయాన్ని ఆయన(ట్రంప్)కే వదిలేయాలని అనుకుంటున్నా."
-కైలీ మెక్ఎనానీ, శ్వేతసౌధ ప్రెస్ సెక్రెటరీ
నిజానికి ట్రంప్ న్యాయపోరాటం ఇదివరకే ముగిసిపోయింది. ఎన్నికల ఫలితాలపై అభ్యంతరాలు వ్యక్తం చేస్తూ ట్రంప్ దాఖలు చేసిన పిటిషన్ను దేశ అత్యున్నత న్యాయస్థానం సుప్రీంకోర్టు కొట్టివేసింది. దీంతో న్యాయపరంగా ఆయనకు అన్నిదారులు మూసుకుపోయాయి.
టీకా స్వీకరించేందుకు ట్రంప్ సిద్ధమే
మరోవైపు, రష్యా అధ్యక్షుడు వ్లాదిమిర్ పుతిన్ నుంచి వచ్చిన అభినందన సందేశానికి ట్రంప్ ఇప్పటివరకు స్పందించలేదని తెలిపారు మెక్ఎనానీ. కరోనా వ్యాక్సిన్ తీసుకునేందుకు ట్రంప్ సిద్ధంగానే ఉన్నారని పేర్కొన్నారు. ఇటీవలే కరోనా నుంచి కోలుకున్న నేపథ్యంలో ఆయనకు వైద్య పరీక్షలు నిర్వహించేంత వరకు ఆగాల్సి ఉందన్నారు. టీకా విషయంలో ఫ్రంట్లైన్ వర్కర్లు, దీర్ఘకాల వ్యాధులు ఉన్నవారికే తొలి ప్రాధాన్యం ఇస్తామని స్పష్టం చేశారు. ప్రజల్లో టీకాపై విశ్వాసం కలిగించేందుకు శ్వేతసౌధ అధికారులు వ్యాక్సిన్ స్వీకరిస్తారని తెలిపారు.
