భారత్​కు చాలా సాయం చేస్తున్నాం: బైడెన్

కరోనా పోరులో భారత్​ కోసం అమెరికా చాలా చేస్తోందని అగ్రరాజ్య అధ్యక్షుడు జో బైడెన్ అన్నారు. భారత ప్రధానమంత్రి నరేంద్ర మోదీతో మాట్లాడినట్లు చెప్పారు. టీకా తయారీకి కావాల్సిన ముడి పదార్థాలను భారత్​కు పంపిస్తున్నట్లు తెలిపారు.

భారత్​కు అమెరికా గణనీయమైన సహకారం అందిస్తోందని అగ్రరాజ్య అధ్యక్షుడు జో బైడెన్ చెప్పారు. కరోనా సంక్షోభం ఎదుర్కొంటున్న భారత్​కు వైద్య పరికరాలు, ఔషధాలు, ఆక్సిజన్, టీకాలు పంపిస్తున్నట్లు తెలిపారు. భారత ప్రధానమంత్రి నరేంద్ర మోదీతో తాను మాట్లాడినట్లు చెప్పారు.

"భారత ప్రధానమంత్రి నరేంద్ర మోదీతో నేను మాట్లాడాను. ఆ దేశానికి అత్యవసరంగా కావాల్సిన వాటి గురించి అడిగాను. టీకాలు తయారు చేసుకునేందుకు పదార్థాలు కావాలని ఆయన చెప్పారు. వాటిని పంపిస్తున్నాం. ఆక్సిజన్ పంపిస్తున్నాం. ఇతర పరికరాలనూ చేరవేస్తున్నాం. భారత్ కోసం మేం చాలా చేస్తున్నాం."

-జో బైడెన్, అమెరికా అధ్యక్షుడు

ఆస్ట్రాజెనెకా టీకాను కెనడా, మెక్సికో దేశాలకు పంపినట్లు బైడెన్ తెలిపారు. జులై 4 నాటికి అమెరికాలోని 10 శాతం టీకాలను ఇతర దేశాలకు పంపిణీ చేస్తామని చెప్పారు. టీకా అందుకునే దేశాల్లో భారత్ కూడా ఉంటుందని స్పష్టం చేశారు.

అమెరికా నుంచి ఇప్పటివరకు ఆరు విమానాలు భారత్​కు చేరుకున్నాయి. ఔషధాలు, వైద్య పరికరాలు, ఆక్సిజన్ సిలిండర్లను వీటిలో పంపించింది అమెరికా.

ఇదీ చదవండి:అమెరికా నుంచి 1.25లక్షల రెమిడెసివిర్ వయల్స్​