కరోనాపై పోరులో మరో అడుగు ముందుకేశారు పరిశోధకులు. కొవిడ్-19 యాంటీవైరల్ చికిత్స కోసం ఏ కణాన్ని లక్ష్యంగా చేసుకోవాలన్న అంశంపై ఓ అంచనాకు వచ్చారు. కరోనా వైరస్ హోస్ట్ కణాల్లోకి ప్రవేశించే తీరు, ఇతర వైరస్లలో ఈ ప్రక్రియ జరిగే విధానాన్ని పరిశీలించడం ద్వారా ఈ విషయం కనుగొన్నారు అమెరికా కార్నెల్ విశ్వవిద్యాలయానికి చెందిన శాస్త్రవేత్తలు. తమ విశ్లేషణ నిజమని తేలితే... కరోనాకు చికిత్స చేయడం సులభతరమవుతుందని భావిస్తున్నారు.
కార్నెల్ వర్సిటీ పరిశోధకుల అధ్యయనానికి సంబంధించిన కథనం 'యాంటీ వైరల్ రీసెర్చ్' పత్రికలో ప్రచురితమైంది.
కణాల్లోకి వైరస్ ప్రవేశిస్తుందిలా..
"వైరస్ వ్యాప్తి చేసేందుకు సరైన కణాన్ని గుర్తించడం ద్వారా 'పొర సంలీనం' అనే ప్రక్రియ ప్రారంభమవుతుంది. అనంతరం హోస్ట్ కణాల నుంచి సమాచారాన్ని సేకరించి.. కణాల ఉపరితలాలపై వైరస్ దాడి చేస్తుంది.
ఈ ప్రక్రియ అనంతరం 'ఫ్యూజన్ పెప్టైడ్' ప్రారంభమవుతుంది. హోస్ట్ కణ పొరలతో వైరస్ మమేకమై... 'ఫ్యుజన్ పోర్'ను(కణానికి రంధ్రం) ఏర్పరుస్తుంది. తర్వాత వైరస్ తన జన్యువును ప్రవేశపెట్టి హోస్ట్ కణాలను తన అధీనంలోకి తీసుకుంటుంది. తద్వారా మరిన్ని వైరస్ కణాలను ఉత్పత్తి చేస్తుంది" అని వివరించారు పరిశోధకులు.
కరోనాతో పాటు మెర్స్, సార్స్ వైరస్ ఇతర ప్రోటీన్ కణాలతో ప్రవర్తించే తీరునూ తమ నివేదికలో వివరించారు. ప్రస్తుత కరోనాకు, 2002-03 నాటి సార్స్కు 93శాతం సారూప్యత ఉందని వెల్లడించారు.
తర్వాతి పరిశోధనల్లో...
కరోనా వైరస్ మానవ శరీరంలో కదిలే విధానం, రసాయన సంకేతాలు, శ్వాసకోశంలో వైరస్ ఎందుకు అంత తేలికగా వ్యాప్తి చెందుతుందో అనే విషయాలు భవిష్యత్ అధ్యయనాల్లో తెలుసుకోవాలని భావిస్తున్నట్లు పరిశోధకులు తెలిపారు.
ఇదీ చదవండి:కరోనా సంక్షోభంలో అసలైన హీరోలు వారే: సుప్రీం
