కరోనా వైరస్‌పై పోరులో భాగంగా ప్రపంచవ్యాప్తంగా అన్ని దేశాలు వ్యాక్సిన్ కోసం ఎదురు చూస్తున్నాయి. ఈ సమయంలోనే వ్యాక్సిన్ పరిశోధనలో ముందున్న మూడు కంపెనీలు.. ఓ సంయుక్త ప్రకటన చేసే యోచనలో ఉన్నట్లు తెలుస్తోంది. ముఖ్యంగా తమ వ్యాక్సిన్ సురక్షితమైందని, సమర్థంగా పనిచేస్తుందని నిరూపితమయ్యే వరకూ ప్రభుత్వం ఆమోదం కోసం సంప్రదించవద్దని.. ఫైజర్‌, మోడెర్నా, జాన్సన్‌ అండ్ జాన్సన్‌ కంపెనీలు ప్రజాప్రతిజ్ఞ చేయనున్నట్లు సమాచారం.
క్లినికల్‌ ప్రయోగాలతోపాటు వ్యాక్సిన్ తయారీలో అత్యున్నత శాస్త్రీయ పద్ధతులు, నైతిక ప్రమాణాలు పాటిస్తున్నామని చెప్పనున్నాయి ఆయా తయారీ సంస్థలు. ఇందులో భాగంగానే ప్రజా ప్రతిజ్ఞ చేసేందుకు సిద్ధమైనట్లు ది వాల్‌స్ట్రీట్‌ జర్నల్‌ పేర్కొంది. దీనికి సంబంధించిన ముసాయిదా గురించి చెప్పిన సదరు వార్తా సంస్థ.. రానున్న వారంలోనే ఈ కంపెనీలు హామీ ప్రకటన చేయనున్నట్లు తెలిపింది.